I dërguari i posaçëm i Australisë për luftën kundër islamofobisë ka bërë thirrje për një hetim lidhur me përdorimin e forcës nga policia dhe largimin me forcë të besimtarëve gjatë një tubimi protestues në Sidnei të hënën kundër vizitës së presidentit izraelit, Isaac Herzog, raportuan të martën mediat lokale, transmeton Anadolu.

I dërguari i posaçëm Aftab Malik gjithashtu i kërkoi kryeministrit të Uellsit të Ri Jugor (NSW), Chris Minns, që të kërkojë publikisht falje ndaj komunitetit mysliman, sipas SBS News.

"Nuk kishte absolutisht në asnjë mënyrë që mund të justifikonte policinë të shpërndante njerëz që po faleshin në mënyrë të qetë, jo kërcënuese dhe paqësore, si dhe t'i godiste, t'i kapte dhe t'i hidhte individët mbi beton", tha Malik.

Ai paralajmëroi se dështimi i policisë për të pranuar keqbërjen do të shkaktonte dëme afatgjata në marrëdhëniet me komunitetet myslimane.

"Policia duhet ta pranojë se ajo që ndodhi ishte e paprovokuar, e panevojshme dhe joproporcionale dhe nëse nuk dalin me këtë pranim, do të dëmtohen në mënyrë të pariparueshme marrëdhëniet mes myslimanëve dhe Policisë së NSW-së", tha ai.

Ndërkohë, kryeministri Anthony Albanese të martën bëri thirrje për qetësi, duke e përshkruar dhunën policore si "shkatërruese".

Duke folur në parlament, ku opozita e Partisë së Gjelbër kërkoi që presidenti izraelit të dërgohej përsëri në vendin e tij, Albanese tha: "Dhuna që pamë mbrëmë ishte shkatërruese dhe e di që të gjithë australianët i gjetën ato pamje shumë tronditëse".

Ai shtoi se Policia e NSW-së do të rishikojë pamjet e incidentit, veçanërisht në lidhje me besimtarët që po faleshin kur u përdor forca.

Pamje që qarkullojnë në internet nga protesta e së hënës treguan policinë e NSW-së duke larguar me forcë besimtarë myslimanë dhe duke i zvarritur ata ndërsa po kryenin lutjet.

Incidenti nxiti dënim të gjerë, përfshirë nga Këshilli Kombëtar i Imamëve të Australisë, i cili i përshkroi veprimet e policisë si "tronditëse, thellësisht shqetësuese dhe plotësisht të papranueshme".

Policia dhe protestuesit u përplasën ndërsa mijëra demonstrues dolën në rrugë në mbarë Australinë për të protestuar kundër vizitës së Herzogut, që filloi të hënën.

Herzog ndodhet në Australi për një vizitë zyrtare dhe që nga mbërritja e tij në Sidnei është shoqëruar nga masa të forta sigurie, përfshirë policinë, personel sigurie izraelitë dhe snajperë, ku ai u takua me liderë të komunitetit hebre pas sulmit terrorist në Bondi në dhjetor.

Vitin e kaluar, një komision i posaçëm hetimor i Këshillit të OKB-së për të Drejtat e Njeriut mbi luftën në Gaza tha se Izraeli po kryente gjenocid dhe citoi deklaratat e bëra nga Herzog pas sulmit të Hamasit më 7 tetor 2023 si prova të qëllimit gjenocidal.

Izraeli nisi ofensivën e tij ushtarake në Gaza në tetor 2023. Më shumë se 72.000 palestinezë janë vrarë dhe mbi 171.000 janë plagosur, sipas Ministrisë së Shëndetësisë në Gaza, ndërsa rreth 90 për qind e infrastrukturës së Gazës është shkatërruar.

Pavarësisht armëpushimit, ushtria izraelite ka vazhduar ta shkelë atë, duke vrarë 576 palestinezë dhe duke plagosur 1.543 të tjerë, tha ministria.