Gjermania sot i paralajmëroi shtetasit e saj të cilët udhëtojnë në SHBA të jenë vigjilentë dhe të tregojnë kujdes të shtuar pas të shtënave fatale të një qytetari amerikan gjatë një operacioni nga Zyra Amerikane e Imigracionit dhe Doganave (ICE) në Minneapolis, transmeton Anadolu.

"Në Minneapolis dhe qytete të tjera, demonstratat ndonjëherë çuan në përleshje të dhunshme me autoritetet e imigracionit dhe sigurisë. Qëndroni të informuar përmes mediave lokale. Jini vigjilentë dhe qëndroni larg turmave ku dhuna mund të shpërthejë potencialisht", tha Ministria e Jashtme gjermane në faqen e saj të internetit.

"Qëndroni të qetë dhe ndiqni udhëzimet e autoriteteve dhe forcave lokale të sigurisë", shtoi ajo.

Kancelari gjerman, Friedrich Merz shprehu shqetësim të hënën për të shtënat fatale të Alex Pretti-t në Minesota. "Lajmet që kemi marrë nga SHBA-ja në ditët e fundit janë vërtet shqetësuese. Dhe padyshim që gjithmonë është një rajon ose një qytet që preket", tha Merz në Hamburg.

"Supozoj se autoritetet amerikane tani do të sqarojnë vërtet nëse ishte e nevojshme të qëllohej këtu, nëse kishte vërtet kërcënim për oficerët e përfshirë. E konsideroj shqetësues këtë nivel të përdorimit të dhunës në SHBA, për ta thënë kështu", shtoi ai.

Personi 37-vjeçar u qëllua dhe u vra të shtunën në Minneapolis të Minesotës, në të shtënat e dyta fatale të një qytetari amerikan në qytet nga agjentë federalë këtë muaj. Qeveria amerikane i përshkroi të shtënat fatale si vetëmbrojtje. Megjithatë, video-pamjet nga vendngjarja të postuara në internet japin pamje tjetër.