Bashkimi Evropian (BE) riafirmoi kundërshtimin e tij ndaj çdo përpjekjeje për ndryshime demografike ose territoriale në Rripin e Gazës, pas raportimeve për mbërritjen e refugjatëve palestinezë në Johanesburg të Afrikës së Jugut javën e kaluar, raporton Anadolu.

Të enjten e kaluar, Afrika e Jugut dha një përjashtim 90-ditor nga viza për 153 palestinezë që mbërritën nga Kenia për të kërkuar azil në vend, megjithëse fillimisht iu mohua hyrja për shkak të mungesës së dokumenteve të udhëtimit dhe vulave të zakonshme të nisjes në pasaportat e tyre.

Sipas të përditshmes izraelite "Haaretz", një shoqatë e drejtuar nga një burrë me shtetësi të dyfishtë izraelito-estoneze u shet palestinezëve në Gaza bileta për fluturime çarter që shkojnë në vende të largëta si Indonezia, Malajzia dhe Afrika e Jugut për rreth 2.000 dollarë.

Ministri i Jashtëm i Afrikës së Jugut, Ronald Lamola tha të hënën se mbërritja në Johanesburg javën e kaluar e një avioni që transportonte refugjatë palestinezë ishte një "operacion i orkestruar qartë" për të zhvendosur palestinezët.

Izraeli kishte diskutuar më parë me disa vende, përfshirë Sudanin e Jugut, mundësinë e zhvendosjes së palestinezëve atje.

Zëdhënësi i Komisionit Evropian (KE), Anouar El Anouni u tha gazetarëve në Bruksel se "nuk ishte në dijeni të këtyre raporteve", por theksoi se qëndrimi i BE-së "mbetet i pandryshuar për këtë çështje".

"BE-ja hedh poshtë çdo përpjekje për ndryshime demografike ose territoriale në Rripin e Gazës dhe ne mbështesim bashkimin e Rripit të Gazës me Bregun Perëndimor nën Autoritetin Palestinez", tha ai.

El Anouni kujtoi vërejtjet e presidentes së KE-së, Ursula von der Leyen e cila tha se "Gaza është një pjesë thelbësore e shtetit të ardhshëm palestinez dhe nuk duhet të ketë zhvendosje të mëtejshme të detyruara".

Zëdhënësja tjetër, Paula Pinho tha se situata do të shqyrtohet. "Kam parë disa raporte sot në mëngjes rreth kësaj. Duhet ta shqyrtojmë më tej. Nuk jam e sigurt nëse bëhej fjalë për zhvendosje të detyruar apo për zhvendosje vullnetare", tha ajo.