Australia sot u dha viza humanitare pesë futbollisteve iraniane pasi presidenti i SHBA-së Donald Trump i kërkoi Australisë një ditë më parë t'u jepte azil, transmeton Anadolu.

Kryeministri australian Anthony Albanese, ndërsa njoftoi vendimin, tha se këto lojtare tani janë të sigurta në Australi.

"Ne u dhamë pesë viza humanitare anëtareve të ekipit iranian të futbollit të femrave. Ne ishim përgatitur për këtë për njëfarë kohe", tha ai në një video-deklaratë të postuar në platformën amerikane të mediave sociale X.

Australianët janë prekur nga gjendja e vështirë e këtyre grave të guximshme. Ato janë të sigurta këtu dhe duhet të ndihen si në shtëpi këtu, shtoi ai.

Zhvillimi erdhi pasi presidenti Trump të hënën i kërkoi Australisë t'u jepte azil anëtareve të ekipit kombëtar të futbollit të femrave të Iranit, duke thënë se lojtaret mund të përballen me rrezik të madh nëse detyrohen të kthehen në vendin e tyre.

Trumpi më vonë tha se kishte folur me Albanesen për këtë çështje.

Ekipi kombëtar i futbollit të femrave të Iranit garoi në Kupën Aziatike të Femrave AFC 2026, të organizuar në Australi, duke tërhequr vëmendjen globale pasi lojtaret organizuan protestë të heshtur kundër qeverisë së Teheranit duke qëndruar në heshtje gjatë himnit kombëtar para ndeshjes së tyre hapëse. Ekipi më vonë u eliminua nga turneu.