Ligjvënësit francezë kanë miratuar projektligjin që do të ndalojë përdorimin e mediave sociale nga fëmijët nën moshën 15-vjeç, një veprim i mbështetur nga presidenti Emmanuel Macron si një mënyrë për të mbrojtur të miturit, transmeton Anadolu.

Projektligji u miratua nga Dhoma e ulët e Parlamentit, Asambleja Kombëtare, me 130 vota pro dhe 21 kundër, pas një seance të gjatë të hënën në mbrëmje.

Legjislacioni tani do t'i dërgohet Senatit për shqyrtim të mëtejshëm përpara se të bëhet ligj. Macron e mirëpriti votimin duke e quajtur atë një hap të madh drejt mbrojtjes së fëmijëve dhe adoleshentëve francezë.

Ai tha se tani i takon Senatit të vazhdojë këtë "punë konstruktive" në mënyrë që ndalimi të jetë efektiv që nga fillimi i vitit të ardhshëm shkollor. "Sepse mendjet e fëmijëve tanë nuk janë në shitje. As për platformat amerikane, as për rrjetet kineze", tha ai.

"Sepse ëndrrat e tyre nuk duhet të diktohen nga algoritmet. Sepse nuk duam një brez të shqetësuar, por një brez që beson në Francë, Republikën dhe vlerat e saj", theksoi Macron.

Presidenti francez përfundoi duke thënë se do të sigurojë që deri më 1 shtator, fëmijët dhe adoleshentët francezë "më në fund të jenë të mbrojtur".