Presidenti francez, Emmanuel Macron, ka deklaruar se nuk beson në një rend ndërkombëtar të ndërtuar mbi një marrëdhënie “suzeran-vasal”, transmeton Anadolu.

“Dua të shmang një përçarje ndërkombëtare dhe nuk besoj në një rend ndërkombëtar që reduktohet në një marrëdhënie suzeran-vasal”, u tha Macron gazetarëve gjatë vizitës së tij në Indi.

I pyetur nëse dyshon për “një lloj përplasjeje pushteti me amerikanët”, Macron nuk u pajtua, duke theksuar se mbështet plotësisht një vizion të diplomacisë së pavarur, të bazuar në sovranitet, respekt dhe multilateralizëm.

- Macron i kërkon kryeministres italiane të ndalojë komentet për vendet e tjera

Macron reagoi edhe ndaj deklaratave të kryeministres italiane, Giorgia Meloni, në platformën amerikane X, ku ajo dënoi vrasjen e aktivistit nacionalist Quentin Deranque, i cili vdiq pas përleshjeve midis grupeve të majta dhe të djathta ekstreme në Lyon.

Meloni e cilësoi vdekjen e tij si “një plagë për gjithë Evropën”.

Sipas BFMTV-së, Macron i kërkoi Melonit të ndalojë “komentimin mbi atë që ndodh në vende të tjera”.

“Secili të merret me punët e veta”, shtoi ai.

11 persona janë arrestuar në kuadër të hetimeve për “vrasje me dashje” lidhur me rastin. Macron theksoi se mbetet “jashtëzakonisht i kujdesshëm”, ndërsa hetimet vazhdojnë.

“Asnjë grup që ushtron dhunë nuk ka legjitimitet në Republikë”, deklaroi ai.