KUDS (AA) – Ministri izraelit i Strehimit, Yitzhak Goldknopf dha dorëheqje sot për shkak të dështimit të qeverisë për të miratuar një ligj që përjashton hebrenjtë ultra-ortodoksë nga shërbimi ushtarak, njoftoi gazeta "Yedioth Ahronoth", transmeton Anadolu.

Dorëheqja vjen ndërsa komunitetet ultra-ortodokse vazhdojnë të protestojnë kundër shërbimit ushtarak pas një vendimi të Gjykatës Supreme të 25 qershorit 2024 që i detyron ata të regjistrohen në ushtri dhe ndalon mbështetjen financiare për institucionet fetare, studentët e të cilëve refuzojnë të shërbejnë.

Hebrenjtë ultra-ortodoksë ose Haredi përbëjnë rreth 13 për qind të 10 milionë qytetarëve të Izraelit.

Ata kundërshtojnë shërbimin ushtarak për arsye fetare, duke argumentuar se studimi i Torës është detyra e tyre kryesore dhe se integrimi në shoqërinë laike kërcënon identitetin e tyre fetar dhe kohezionin e komunitetit.