SAMARKAND (AA) - Në Semerkand, Uzbekistan, një nga qendrat e Rrugës së Mëndafshit, produktet tradicionale të mëndafshit dallohen si një nga tiparet më të çmuara të qytetit. Qilimat e mëndafshit, të cilët duhen të paktën një vit për t'u endur, demonstrojnë vlerën që i jepet punës, transmeton Anadolu.

Historikisht një qendër e shkencës dhe kulturës, Samarkandi është veçanërisht i njohur për endjen e mëndafshit. Turistët që vizitojnë qytetin eksplorojnë vendet ku prodhohen dhe shiten qilima mëndafshi dhe produkte të tjera të ndryshme.

Një nga vendet e famshme të vizituara është "Fabrika e Qilimave të Mëndafshit Semerkand Buhara".

Vizitorët në këtë fabrikë mund të shohin dhe të mësojnë rreth procesit të endjes së qilimave dhe, nëse dëshirojnë, të blejnë qilima ose produkte të tjera mëndafshi.

Përveç qilimave, fabrika prodhon dhe shet edhe sexhade, çanta, xhaketa, shalle dhe artikuj të ndryshëm veshjesh. Të gjitha produktet janë bërë prej mëndafshi, prandaj janë të shtrenjta.

Në këtë punishte, qilimat janë endur vetëm me mëndafsh dhe lesh. Produktet natyrore përdoren për të ngjyrosur mëndafshin dhe leshin. Procesi i ngjyrosjes së produkteve varion nga 20 minuta deri në 1 orë, varësisht nga materiali i përdorur.

- Endja e një qilimi mund të zgjasë më shumë se një vit

Duhet afërsisht një vit për të endur një qilim mesatar prej 4 metrash katrorë. Një qilim mostër i kësaj madhësie ka 1.145 lake në një rresht të vetëm. Sa më i lartë numri i lakeve në një qilim mëndafshi, aq më e lartë është vlera e tij.

Për më tepër, palosja e qilimit përgjysmë në një pikë zbulon laket si pika individuale. Kjo është një metodë tjetër e përdorur për të përcaktuar nëse qilimi është mëndafsh.

Nëse qepjet individuale nuk janë të dukshme, është e qartë se qilimi nuk është i punuar me dorë dhe nuk është mëndafsh, sepse këto lloje qepjesh nuk mund të bëhen me makina.

Për shkak se mëndafshi është një material i fortë, makinat nuk mund ta endin atë.