Dhjetëra fëmijë në Liban kanë krijuar mbi 400 piktura, duke pikturuar skena shpresëdhënëse nga skenat e shkatërrimit dhe shpërthimeve që kanë parë.

Ekspozita "Libani me Ngjyra" u hap në qytetin e Saidës për të tërhequr vëmendjen ndaj ndikimit të shkatërrimit të shkaktuar nga sulmet dhe luftërat në Liban tek fëmijët.

Ekspozita shfaqi mbi 400 piktura të krijuara nga 85 fëmijë dhe studentë të moshës 3-20 vjeç, të udhëhequr nga artistja, Nevin Juma.

Fëmijët libanezë i shndërrojnë skenat e luftës dhe të shkatërrimit në piktura shpresëdhënëse https://t.co/GoUDDt21hc pic.twitter.com/UE2qeViIYN

— Anadolu Shqip (@aa_albanian) November 23, 2025

Veprat në ekspozitë pasqyruan marrëdhënien që fëmijët libanezë kanë me imazhet e luftës. Studentët pikturuan skena shpresëdhënëse nga skenat e shkatërrimit dhe shpërthimeve që kanë parë.

Në një deklaratë për Anadolu, artistja Nevin Juma shpjegoi se ekspozita paraqet piktura që përshkruajnë kujtime të së kaluarës dhe shpresë për ditën e re.

"Bëra një foto të njërit prej bombardimeve që kishin në shënjestër Bejrutin dhe e shndërrova në një pikturë, duke vizatuar një engjëll të vogël që flinte e qetë. Bazuar në këtë, ne i transformuam fotografitë e luftës që përfaqësonin shkatërrimin në piktura shumëngjyrëshe", tha ajo.

- "Çdo person duhet të jetojë në një mjedis të bukur"

Gjashtëvjeçarja Kamar Arnaut, një nga fëmijët pjesëmarrës në ekspozitë, tha për pikturën e saj: "Vizatova se si ishte Bejruti gjatë luftës, shkatërrimin dhe skenën e trishtueshme. Por pastaj e transformova në diçka të bukur dhe shumëngjyrëshe. Sepse çdo person duhet të jetojë në një mjedis të bukur".

Sasha, shtatëvjeçare, shpjegoi se vepra e saj artistike përshkruante ushtarë izraelitë që dëmtonin pianon e një vajze në qytetin Khiam në Libanin jugor. "Kjo histori më preku thellë sepse e dua artin dhe të luaj në piano. Kjo është arsyeja pse e realizova pikturën ashtu siç doja ta shihja atë skenë", tha ajo.

Lara Azavat, nëna e njërit prej fëmijëve që morën pjesë në ekspozitë, shprehu gëzimin e saj që iu dha kjo mundësi, duke thënë: "Çdo fëmijë ndihej si një artist i vogël sepse kaq shumë njerëz e panë punën e tyre dhe e admiruan atë".

Njëmbëdhjetëvjeçarja Rin Hajjac, e cila vizatoi një oficer të mbrojtjes civile që mbante flamurin libanez tha: "Doja të përcillja mesazhin se, pavarësisht të gjitha vuajtjeve, shpresa do të lulëzojë përsëri në Liban dhe se njerëzimi dhe dashuria do të vazhdojnë të ekzistojnë".