Presidenti i SHBA-së, Donald Trump, ka njoftuar se ka emëruar ish-guvernatorin e Rezervës Federale (Fed), Kevin Warsh, si kandidatin e tij për kryetar të ardhshëm të Fed-it, duke theksuar se ai do të jetë "një nga kryetarët e mëdhenj të Fed-it, ndoshta më i miri", transmeton Anadolu.

"Me kënaqësi njoftoj se po nominoj Kevin Warsh-in për kryetar të Bordit të Guvernatorëve të Sistemit të Rezervës Federale", shkroi Trump në platformën e tij Truth Social.

"E njoh Kevin-in prej një kohe të gjatë dhe nuk kam asnjë dyshim se ai do të hyjë në histori si një nga kryetarët e mëdhenj të Fed-it, ndoshta më i miri", shtoi ai.

Duke e quajtur Warsh-in "zgjedhje ideale", Trump tha se ai nuk do t'ju "zhgënjejë kurrë".

Warsh ka qenë këshilltar i Trumpit për strategjinë ekonomike dhe më parë ka shërbyer në Bordin e Guvernatorëve të bankës qendrore amerikane nga viti 2006 deri në vitin 2011.

Nëse nominohet dhe konfirmohet, Warsh do të zëvendësojë Jerome Powell-in, mandati i të cilit si kryetar i Fed-it përfundon në muajin maj.

Me emërimin e mundshëm të tij, 55-vjeçari do të rikthehej në qendër të vëmendjes pasi Powell u zgjodh nga Trump në vitin 2017 për postin më të lartë.

Pavarësisht reputacionit të tij të mëparshëm si mbështetës i politikave të ashpra kundër inflacionit, Warsh kohëve të fundit është rreshtuar me Trumpin duke mbrojtur publikisht norma më të ulëta interesi.

Megjithatë, procesi i konfirmimit mund të rezultojë i vështirë, pasi disa senatorë republikanë janë zotuar se do të bllokojnë çdo emërim në Fed derisa Departamenti Amerikan i Drejtësisë të përfundojë një hetim mbi rinovimin e selisë së bankës qendrore në Washington.