STAMBOLL (AA) – "Toyota Motor" ka ruajtur titullin e saj si prodhuesi i automjeteve me më shumë shitje në nivel global për të gjashtën herë radhazi, me 5.5 milionë shitje në periudhën janar-qershor 2025, sipas rezultateve financiare të kompanisë të publikuara të mërkurën, transmeton Anadolu.

Shitjet globale të automjeteve të Toyotas janë rritur me 7.4 për qind në bazë vjetore në gjysmën e parë të vitit. Kjo shifër për gjysmën e parë të vitit paraqet shifrën më të lartë globale të shitjeve për kompaninë japoneze ndonjëherë.

Shitjet vendase janë rritur me 27.4 për qind në 1 milion automjete, ndërsa shitjet jashtë vendit me 3.6 për qind, për të arritur në 4.5 milionë njësi.

Shifrat e shitjeve të automjeteve përfshijnë gjithashtu shitjet e prodhuesit të minimakinave "Daihatsu" dhe prodhuesit të kamionçinave "Hino", të dy pjesë të Grupit "Toyota Motor".

Gjatë periudhës gjashtëmujore, shitjet e Toyotas në SHBA janë rritur me 4.2 për qind në 1.24 milion njësi dhe në Kinë, shitjet janë rritur me 6.8 për qind në 837.744 njësi.

Me këto rezultate, kompania e tejkaloi rivalin e saj më të afërt, "Volkswagen AG".

"Volkswagen AG" ka rritur shitjet globale të automjeteve me 1.3 për qind, për të arritur 4.41 milionë njësi, në periudhën janar-qershor 2025 krahasuar me gjysmën e parë të vitit 2024.