Kreu i Shërbimit Federal të Doganës Ruse (FTS), Vladimir Bulavin bëri të ditur se statistikat e import-eksportit në vend nuk do të publikohen përkohësisht, raporton Anadolu Agency (AA).

Bulavin në deklaratën e tij për gazetarët në Moskë tha se nuk do të publikohen statistikat e import-eksportit të Rusisë.

"Unë e mbështes këtë vendim për të shmangur parashikimet e gabuara, spekulimet dhe mospërputhjet. Ky vendim është masë e përkohshme", tha ai.

Statistikat e fundit rreth import-eksportit të Rusisë ishin publikuar në muajin janar.

Në hulumtimin e kryer nga Banka Qendrore e Rusisë thuhet se eksportet e vendit pritet të ulen me 12 për qind duke rënë në 484 miliardë dollarë këtë vit ndërsa importet të ulen me 30 për qind në 266 miliardë dollarë.