VJENË (AA) - Anëtarët e Organizatës së Vendeve Eksportuese të Naftës (OPEC) dhe disa vende aleate joanëtare, gjatë takimit të OPEC-ut në Vjenë kanë vendosur të reduktojnë prodhimin ditor të naftës për të balancuar tregun global të naftës, raporton Anadolu Agency (AA).

Suhail Mohammed Al Mazrouei, kryetar i Konferencës së OPEC-ut dhe ministër i Energjisë i Emirateve të Bashkuara Arabe (EBA), tha se OPEC ka vendosur që prodhimi ditor të reduktohet deri në 800.000 fuçi.

"Vendet joanëtare të OPEC-ut kanë vendosur po ashtu të reduktojnë prodhimin e tyre të përditshëm për 400.000 fuçi. Kështu, u vendos që prodhimi total të reduktohet për 1,2 milion fuçi", tha Al Mazrouei në konferencën për shtyp të mbajtur pas takimit të vendeve të OPEC-ut dhe vendeve që i janë bashkuar nismës dhe nuk janë anëtare të kësaj organizate, së bashku të njohura si OPEC+.

Ai vuri në dukje se bisedimet zgjatën më shumë sesa që pritej, duke shtuar se ai megjithatë është i kënaqur, për shkak të, siç tha, vendimeve të suksesshme që përfundimisht arritën t'i sjellin.

Për këtë vendim, ai veçanërisht falënderoi Rusinë dhe vendet joanëtare të OPEC-ut.

Vendimi për të reduktuar prodhimin ditor të naftës do të fillojë të zbatohet në janar të vitit 2019 dhe do të zbatohet në gjashtë muajt vijues.

Kujtojmë se takimi i 175-të i OPEC-ut dhe vendeve joanëtare filloi të enjten.