Qeveria kroate miratoi sot një paketë të re masash që synojnë zbutjen e pasojave të ndërprerjeve në tregun global të energjisë të shkaktuara nga lufta në Lindjen e Mesme, përfshirë kufizimin e rritjes së çmimeve të karburantit dhe ruajtjen e stabilitetit të furnizimit, raporton Anadolu.

Kryeministri Andrej Plenkoviq tha se kjo është paketa e dhjetë e ndihmës për qytetarët dhe ekonominë që nga fillimi i serisë së krizave që kanë goditur vendin që nga viti 2020.

"Masat e mëparshme mundësuan stabilitetin, duke ruajtur konkurrueshmërinë e ekonomisë dhe vendet e punës. Paketa e re vjen në një mjedis ndërkombëtar të ndryshuar ndjeshëm, të karakterizuar nga sfidat e sigurisë dhe energjisë", tha Plenkoviq.

Ai paralajmëroi se lufta në Lindjen e Mesme përbën rrezik serioz për tregun global të energjisë, duke theksuar rëndësinë e Hormuzit si një pikë kyçe përmes së cilës kalon pjesa më e madhe e tregtisë botërore të naftës dhe gazit.

"Nuk duhet të futemi në një situatë mungese. Qëllimi është të sigurojmë furnizim të qëndrueshëm dhe të lehtësojmë presionin mbi rritjen e çmimeve, duke ruajtur vendet e punës dhe aktivitetin ekonomik", shtoi Plenkoviq në seancën qeveritare në Zagreb.

Sipas masave të reja, çmimet e karburantit do të kufizohen pjesërisht. Një litër Eurodizel do të kushtojë 1,73 euro, ndërsa pa ndërhyrjen çmimi do të ishte rritur në 1,86 euro. Eurosuper do të kushtojë 1,62 euro për litër, në vend të 1,71 eurove të pritura, ndërsa çmimi i naftës blu do të jetë 1,19 euro.

Masat nuk do të zbatohen për pikat e karburanteve në autostrada, ku çmimet do të mbeten të parregulluara.

Qeveria vendosi gjithashtu që çmimet e energjisë elektrike të mbeten të pandryshuara për gjashtë muajt e ardhshëm, ndërsa çmimi i gazit do të mbetet i njëjtë deri në fund të shtatorit.

Plenkoviq theksoi se pavarësisht mundësive të kufizuara për të ndaluar plotësisht rritjen e çmimeve, qëllimi i masave mbetet mbrojtja e standardeve të jetesës së qytetarëve dhe stabiliteti ekonomik në kushte të pasigurisë globale.

Tensionet në rajonin e Lindjes së Mesme janë përshkallëzuar që kur Izraeli dhe SHBA-ja nisën sulme të përbashkëta ndaj Iranit më 28 shkurt. Teherani u hakmor me sulme me dronë dhe raketa ndaj Izraelit, Jordanisë, Irakut dhe vendeve të Gjirit që strehojnë objekte ushtarake amerikane.

Shtrirja e përshkallëzimit aktual është përhapur edhe në Liban që nga 2 marsi, me shkëmbime të shpeshta zjarri midis grupit libanez Hezbollah dhe Izraelit.