Koreja e Jugut gjobit me 33 milionë dollarë prodhuesit gjerman të automjeteve
BMW, Mercedes-Benz, Audi akuzohen se kanë bashkëpunuar për të futur një sistem që shkakton emetime më të larta të oksidit të azotit.
Berlin
Prodhuesit gjermanë të automjeteve BMW, Mercedes-Benz dhe Audi janë urdhëruar të paguajnë gjoba miliona dollarëshe në Korenë e Jugut, transmeton Anadolu.
"Kompanitë gjermane akuzohen se kanë bashkëpunuar për të futur një sistem që shkakton emetime më të larta të oksidit të azotit", njoftoi sot Komisioni i Tregtisë së Paanshme (FTC) në Seul.
Sipas komisionit, Mercedes-Benz Group do të paguajë 20.7 miliardë jen (15.9 milionë dollarë), BMW 15.7 miliardë jen (12.4 milionë dollarë) dhe Audi 5.9 miliardë jen (4.6 milionë dollarë).
Kjo e çon shumën totale për prodhuesit gjermanë të automjeteve në 42.3 miliardë jen (32.9 milionë dollarë).
Grupi Volkswagen, i cili zotëron Audi, nuk detyrohet të paguajë gjobë, sipas vendimit, sepse modelet e afektuara nuk u shitën në Korenë e Jugut.
Komisioni akuzoi prodhuesit gjermanë të automjeteve për shkelje të konkurrencës përmes bashkëpunimit të tyre. Përveç kësaj, thuhet se me veprimet e tyre ata kanë penguar zhvillimin e makinave të reja dizel me teknologji më të avancuara.
Mercedes-Benz Korea sot mohoi akuzat e komisionit në një deklaratë për agjencinë kombëtare të lajmeve të Koresë së Jugut, Yonhap.
Kompania iu referua një rasti identik të trajtuar nga Komisioni Evropian (KE). Megjithatë, ai tha se KE-ja nuk kishte vendosur për ndonjë ndëshkim sepse kompania paraqiti vullnetarisht një raport për këtë çështje.
