Kompania turke ULAQ Global Autonomous Systems, prodhuesi i mjetit të parë sipërfaqësor pa pilot (USV) të vendit, nënshkroi një marrëveshje me SAMI Autonomous Company, një degë e Fondit Publik të Investimeve (PIF) të Arabisë Saudite, për të forcuar bashkëpunimin në sistemet detare pa pilot, raporton Anadolu.

Marrëveshja, e nënshkruar në Panairin Botëror të Mbrojtjes (WDS) 2026 të mbajtur në Riad, synon të krijojë një kuadër gjithëpërfshirës bashkëpunimi që përfshin projektimin, zhvillimin, prodhimin, integrimin e sistemit dhe mirëmbajtjen e sistemeve detare pa pilot në Arabinë Saudite.

Marrëveshja është e para që nënshkruhet në këtë fushë në Arabinë Saudite dhe do të japë një kontribut të madh në aftësitë e saj detare dhe mbrojtëse, në përputhje me objektivat e vendit për Vizionin 2030.

Kerem Kalafatoglu, një anëtar i bordit të drejtorëve në ULAQ Global, tha për Agjencinë Anadolu se marrëveshja midis dy kompanive synon përparimin në zhvillimin e përbashkët, transferimin e teknologjisë dhe prodhimin vendas të USV-ve.

"Aktivitetet tona të biznesit janë të vazhdueshme, jo vetëm me Arabinë Saudite, por në të gjithë botën", tha Kalafatoglu duke shtuar se “Kjo iniciativë do të na ofrojë mundësinë për të gjeneruar përfitime të qëndrueshme dhe ne synojmë të eksportojmë ULAQ USV jo vetëm në Arabinë Saudite, por edhe në pjesën tjetër të botës”.

Kompania turke ULAQ Global do të kontribuojë në prodhimin vendas të USV në Arabinë Saudite duke transferuar njohuritë e akumuluara gjatë viteve me partnerin saudit.

Kalafatoglu theksoi më tej se “Puna jonë vazhdon këtu dhe në Evropë dhe SHBA. Ne synojmë ta rrisim ULAQ Global në një shkallë globale, kështu që shpresoj se së shpejti do të ketë lajme më gjithëpërfshirëse”.