Kompania e teknologjisë financiare Block, pronare e aplikacionit të pagesave dhe financave mobile Cash App, njoftoi të enjten vonë se do të pushojë nga puna më shumë se 4.000 punonjës, ndërsa kompania përqafon inteligjencën artificiale, transmeton Anadolu.

Block, e themeluar nga Jack Dorsey - bashkëthemeluesi i Twitterit, tani i njohur si X publikoi rezultatet e saj financiare për tremujorin e katërt të vitit të kaluar.

Në një letër drejtuar aksionarëve në lidhje me bilancin e kompanisë, bashkëthemeluesi i Block Dorsey tha: "Sot ndamë një vendim të vështirë me ekipin tonë. Po e zvogëlojmë Block-un me gati gjysmën, nga mbi 10 mijë njerëz në pak më pak se 6.000, që do të thotë se mbi 4.000 njerëzve po u kërkohet të largohen ose të hyjnë në konsultim".

Dorsey deklaroi se beson që ky është veprimi i duhur për kompaninë dhe përshkroi arsyet pas vendimit.

Duke treguar ndikimin në rritje të mjeteve të inteligjencës artificiale, Dorsey theksoi se ato po ndryshojnë rrënjësisht atë që do të thotë të ndërtosh dhe drejtosh një kompani.

"Ne tashmë po e shohim këtë brenda kompanisë. Një ekip dukshëm më i vogël, duke përdorur mjetet që po ndërtojmë, mund të bëjë më shumë dhe ta bëjë më mirë. Dhe aftësitë e mjeteve të inteligjencës po shtohen më shpejt çdo javë", tha ai.

Ai shtoi se do të preferonte t'i bënte këto rregullime në mënyrë proaktive dhe transparente, sipas kushteve të vetë kompanisë, sesa të detyrohej të vepronte në përgjigje të presioneve të jashtme.