Në prani të presidentit të Turqisë, Recep Tayyip Erdoğan dhe kryeministrit të Unitetit Kombëtar të Libisë, Abdul Hamid Dbeibeh, zyrtarët e lartë të dy vendeve kanë nënshkruar pesë marrëveshje, raporton Anadolu Agency (AA).

Pas takimit midis presidentit Erdoğan dhe kryeministrit Dbeibeh, si dhe takimit midis delegacioneve të të dy vendeve, u organizua një ceremoni nënshkrimi i disa marrëveshjeve.

Zyrtarët nënshkruan një protokoll dhe memorandum mirëkuptimi për ndërtimin e një termocentrali në Libi, memorandum mirëkuptimi për ndërtimin e një terminali të ri në aeroportin e Tripolit, si dhe memorandum mirëkuptimi për ndërtimin e një qendre të re tregtare në Tripoli.

Po ashtu u nënshkrua një memorandum mirëkuptimi për bashkëpunim strategjik të medias midis Turqisë dhe Unitetit Kombëtar të Libisë, e cila u nënshkrua nga shefi i drejtorisë së komunikimeve turke, Fahrettin Altun dhe ministri libian i komunikimeve, Ammar Mohammed al-Lafi.

Presidenti Erdoğan dhe kryeministri Dbeibeh po ashtu nënshkruan një deklaratë të përbashkët të takimit të parë të Këshillit të Bashkëpunimit Strategjik të Nivelit të Lartë.