Zvicra do të reduktojë blerjen e planifikuar të avionëve luftarakë F-35A
Këshilli Federal në një deklaratë konfirmoi se nuk do të vazhdojë më me planin fillestar për blerjen e 36 avionëve F-35A, në vend të kësaj, brenda kufirit financiar të miratuar nga votuesit, Zvicra pret të blejë rreth 30 avionë luftarakë
Gjenevë
Qeveria zvicerane ka bërë të ditur se do të ulë numrin e avionëve luftarakë F-35A që planifikon të blejë, ndërsa po rishikon gjithashtu blerjen e një sistemi shtesë të mbrojtjes ajrore me rreze të gjatë nga toka, për të forcuar mbrojtjen kombëtare, transmeton Anadolu.
Këshilli Federal në një deklaratë konfirmoi se nuk do të vazhdojë më me planin fillestar për blerjen e 36 avionëve F-35A, në vend të kësaj, brenda kufirit financiar të miratuar nga votuesit, Zvicra pret të blejë rreth 30 avionë luftarakë.
Qeveria do të kërkojë nga parlamenti një kredi shtesë prej 394 milionë frangash zvicerane (mbi 504 milionë dollarë) për të mbuluar kostot më të larta që lidhen me inflacionin, rritjen e çmimeve të lëndëve të para dhe faktorë të tjerë.
Blerja e 36 avionëve të planifikuar fillimisht do të kërkonte rreth 1.1 miliardë franga shtesë (rreth 1.3 miliardë dollarë), të cilat qeveria tha se nuk do t’i kërkojë për arsye të politikës financiare.
Këshilli Federal tha se vendimi ruan përputhshmërinë me kornizën financiare të miratuar nga populli zviceran në një referendum të vitit 2020, i cili autorizoi deri në 6 miliardë franga (rreth 7.7 miliardë dollarë) për avionë të rinj luftarakë.
Veçmas, qeveria tha se ka udhëzuar Ministrinë e Mbrojtjes të shqyrtojë blerjen e një sistemi shtesë të mbrojtjes ajrore me rreze të gjatë nga toka, mundësisht të prodhuar në Evropë, duke marrë në konsideratë sistemin francez SAMP/T.
“Po ndërmarrim veprime vendimtare për të garantuar sigurinë e Zvicrës. Do të vazhdojmë me sistemin e mbrojtjes ajrore Patriot dhe po shqyrtojmë një të dytë, idealisht nga Evropa”, tha ministri zviceran i Mbrojtjes, Martin Pfister.
Ky hap vjen pas vonesave në dorëzimin e sistemeve të mbrojtjes ajrore Patriot të prodhuara në SHBA, të cilat Zvicra i kishte porositur, por që Washingtoni i ka riprioritizuar për të mbështetur Ukrainën.
Sipas informacionit aktual, dorëzimi i pesë njësive të zjarrit Patriot të Zvicrës mund të vonohet me katër deri në pesë vjet.
Ministria e Mbrojtjes pritet të paraqesë një raport mbi shqyrtimin e sistemit shtesë të mbrojtjes ajrore deri në verën e vitit 2027.
Në ueb-faqen e Anadolu Agency mbi sistemin rrjedhës të lajmeve të AA një pjesë e lajmeve të ofruara ndaj abonentëve publikohen duke u përmbledhur. Për abonim ju lutemi na kontaktoni.
