Ky vit ka qenë tashmë viti më me diell i regjistruar ndonjëherë në Mbretërinë e Bashkuar, sipas të dhënave paraprake të shërbimit meteorologjik të vendit, me rreth dy javë të mbetura deri në fund të vitit, transmeton Anadolu.

Deri më 15 dhjetor, Mbretëria e Bashkuar ka regjistruar 1.622 orë me diell, duke tejkaluar rekordin e mëparshëm të vendosur në vitin 2003, njoftoi "Met Office". Mbajtja e të dhënave daton që nga viti 1910.

Edhe Anglia ka përjetuar tashmë vitin e saj më me diell të regjistruar ndonjëherë, duke thyer sërish rekordin e vitit 2003.

Skocia ka shënuar vitin e dytë më me diell deri më tani, ndërsa ky vit në Uells renditet i gjashti për nga orët e diellit.

Irlanda e Veriut ka pasur gjithashtu më shumë diell se mesatarja, megjithëse ende nuk është mes dhjetë viteve më me diell të regjistruara, por mund të hyjë në këtë listë deri në fund të vitit.

"Dielli rekord në mbarë Mbretërinë e Bashkuar këtë vit u nxit nga ndikimi i shpeshtë i presionit të lartë, i cili uli mbulimin e reve dhe solli mot me diell për shumë njerëz", tha në një deklaratë shkencëtari i lartë i Met Office, Mike Kendon.

"Të tre muajt e verës patën gjithashtu orë dielli mbi mesataren dhe, ndonëse periudhat me diell nuk janë të pazakonta në këtë periudhë të vitit, kohëzgjatja dhe qëndrueshmëria e sistemeve me presion të lartë e bënë vitin 2025 dukshëm më me diell se mesatarja", shtoi ai.

"Deri tani këtë vit, vetëm muajt shkurt dhe tetor kanë regjistruar orë dielli nën mesatare", tha Kendon.

Met Office bëri të ditur se shifrat përfundimtare për vitin do të konfirmohen pasi të përfundojë dhjetori, por rekordi tashmë është i sigurt.