Katër palestinezë u vranë dhe një i pestë u plagos nga zjarri i ushtrisë izraelite në Rripin e Gazës, në shkeljen e fundit të marrëveshjes së armëpushimit, transmeton Anadolu.

Spitali Nasser në Gazën jugore tha se trupat e dy personave u transferuan në objekt pas një sulmi me dron izraelit në qytetin Bani Suhaila, në lindje të qytetit Khan Younis.

Dy persona të tjerë u qëlluan për vdekje nga snajperët izraelitë në lagjen Al-Tuffah në qytetin lindor të Gazës, thanë burimet mjekësore.

Një palestinez u plagos gjithashtu nga zjarri i artilerisë pranë të ashtuquajturës "vijë e verdhë" në zonën Al-Shaaf të Al-Tuffah, thanë burimet, pa dhënë detaje rreth gjendjes së tij.

Sipas dëshmitarëve, avionët izraelitë kryen sulme ajrore të shoqëruara me të shtëna tankesh dhe helikopterësh në Rafahun verilindor në Gazën jugore.

Në Khan Younis, forcat izraelite kryen disa sulme ajrore në pjesët lindore të qytetit ku ato mbajnë një prani ushtarake.

Sulmet e reja erdhën në shkelje të armëpushimit që hyri në fuqi në Gaza më 10 tetor.

Sipas autoriteteve lokale, të paktën 342 palestinezë janë vrarë nga zjarri i ushtrisë izraelite që nga armëpushimi.

Që nga tetori i vitit 2023, ushtria izraelite ka vrarë gati 70.000 njerëz në Gaza, kryesisht gra dhe fëmijë, dhe ka plagosur mbi 170.900 në një ofensivë brutale që e shkatërroi pjesën më të madhe të enklavës në rrënoja.