Ushtria izraelite shembi shtëpi dhe sulmoi me artileri në zonat nën kontrollin e saj në Rripin e Gazës, duke shkelur më tej marrëveshjen e armëpushimit, transmeton Anadolu.

Dëshmitarët për Anadolu thanë se ushtria izraelite hodhi në erë disa ndërtesa banimi në lagjen Shujaiya të Qytetit të Gazës, në veri të enklavës, e cila shtrihet brenda zonës së verdhë të kontrolluar nga ushtria izraelite. Në jug, dëshmitarët thanë se artileria izraelite goditi gjithashtu pjesët lindore të qytetit Khan Younis përtej vijës së verdhë.

Nuk kishte informacione shtesë në dispozicion mbi shkallën e dëmeve materiale.

Sipas Mbrojtjes Civile të Gazës, dy palestinezë u vranë dhe disa të tjerë u plagosën brenda një shtëpie në lagjen Al-Nasr të Qytetit të Gazës të hënën në mbrëmje kur shpërtheu një municion izraelit.

Riyad Mansour, i dërguari i Palestinës në OKB, i tha Këshillit të Sigurimit të hënën se ushtria izraelite ka vrarë dy fëmijë palestinezë çdo ditë që kur armëpushimi hyri në fuqi më 10 tetor në Rripin e Gazës, ndërsa numri i të plagosurve dhe të vrarëve është rritur në 1.000.

Sipas Ministrisë së Shëndetësisë së Gazës, të paktën 342 palestinezë janë vrarë dhe gati 900 janë plagosur nga zjarri i ushtrisë izraelite që nga fillimi i armëpushimit.

Që nga tetori i vitit 2023, ushtria izraelite ka vrarë gati 70.000 njerëz në Gaza, kryesisht gra dhe fëmijë, dhe ka plagosur më shumë se 170.900 njerëz gjatë luftës dyvjeçare që e ka lënë pjesën më të madhe të enklavës në rrënoja.