Ushtria izraelite njoftoi se ka nisur ofensivë tokësore për të pushtuar qytetin e Gazës, i cili ndodhet në veri të Rripit të Gazës, transmeton Anadolu.

Në një deklaratë me shkrim, ushtria izraelite tha se sulmet tokësore në qytetin e Gazës filluan natën. Më tej u tha se dy divizione po marrin pjesë aktualisht në sulmet tokësore dhe një e tretë do t'u bashkohet në ditët në vijim.

Raportohet se sulmet filluan në periferi të qytetit të Gazës dhe se një rrethim i qytetit ishte planifikuar në ditët dhe javët në vijim. Kryeministri izraelit Benjamin Netanyahu në seancën dëgjimore për gjyqin për korrupsion tha se ata kishin nisur sulme të dhunshme në qytetin e Gazës.

Qeveria izraelite dëshiron të evakuojë me forcë pjesën veriore të Gazës, ku jetojnë rreth 1 milion palestinezë. Për ta arritur këtë, Izraeli synon të pushtojë Gazën, ku kanë gjetur strehim gati 1 milion palestinezë dhe t'i dëbojë ata në jug të enklavës.

Nëse palestinezët detyrohen të ikin në jug të Rripit të Gazës, duket e pamundur që ata të kthehen ndonjëherë në veri. Të ashtuquajturat "njoftime evakuimi" të përsëritura nga qeveria izraelite, të cilat përfshijnë zhvendosje me forcë, nuk përmbajnë asnjë tregues se palestinezët do të jenë në gjendje të kthehen në veri të Gazës pas përfundimit të sulmeve.