Ushtria izraelite lëshoi të martën paralajmërime për banorët që të evakuojnë zonat në jug të lumit Zahrani në jug të Libanit dhe të zhvendosen menjëherë drejt veriut, ndërsa sulmet ajrore vazhdojnë në rajon, transmeton Anadolu.

Në një deklaratë përmes platformës sociale të kompanisë amerikane X, zëdhënësi i ushtrisë izraelite, Avichay Adraee, tha se paralajmërimi u drejtohej banorëve në jug të lumit Zahrani.

Paralajmërimi vjen në kohën kur tensionet në rajon vazhdojnë të rriten. Të hënën në mbrëmje, Ministria e Shëndetësisë e Libanit njoftoi se numri i të vdekurve që nga fillimi i sulmeve izraelite është rritur në 886, përfshirë 111 fëmijë dhe 67 gra, ndërsa 2.141 persona janë plagosur.

Përshkallëzimi aktual rajonal filloi pas sulmeve të vazhdueshme të SHBA-së dhe Izraelit ndaj Iranit më 28 shkurt. Më pas, Izraeli zgjeroi operacionet kundër Hezbollahut në Liban, pavarësisht një armëpushimi të arritur në fund të vitit 2024.