Numri i gazetarëve të vrarë në sulmet e ushtrisë izraelite në Rripin e Gazës që nga 7 tetori 2023 është rritur në 225, transmeton Anadolu.

Në një deklaratë të bërë nga Zyra e Medias e qeverisë në Gaza, është konfirmuar se katër gazetarë të tjerë palestinezë janë vrarë në sulmet e Izraelit në Gaza.

Pas vdekjes së katër gazetarëve të tjerë në Gaza, numri i gazetarëve që kanë humbur jetën që kur Izraeli "ka filluar gjenocidin e tij" më 7 tetor 2023 është rritur në 225.

Në deklaratë dënohet fuqimisht, shënjestrimi, vrasja dhe kryerja e atentateve sistematike ndaj gazetarëve palestinezë nga ushtria izraelite.

Institucionet e gazetarisë në të gjithë botën janë thirrur të dënojnë këto krime kundër gazetarëve dhe punonjësve të medias palestineze në Gaza.

Përveç Izraelit, vende të tilla si SHBA-ja, Mbretëria e Bashkuar, Gjermania dhe Franca janë mbajtur përgjegjëse për vrasjet e gazetarëve në Rripin e Gazës.

Deklarata gjithashtu i bëri thirrje komunitetit ndërkombëtar dhe institucioneve ndërkombëtare të medias që të "vendosin sanksione parandaluese ndaj Izraelit për të ndaluar vrasjen e gazetarëve palestinezë dhe të ndërmarrin veprime për t'i gjykuar ata në gjykatat ndërkombëtare për krimet e tyre".

Qeveria në Gaza thekson se Izraeli i vret qëllimisht gazetarët në Rripin e Gazës "me qëllim heshtjen e zërave të palestinezëve, të fshehë të vërtetën dhe të parandalojë që lajmet dhe informacionet të arrijnë te opinioni rajonal dhe ndërkombëtar".

Më parë ishte njoftuar se katër gazetarë u vranë dhe disa të tjerë u plagosën në një sulm të kryer nga ushtria izraelite duke përdorur mjete ajrore pa pilot (dronë) në oborrin e Spitalit Baptist Al-Ahli në Qytetin e Gazës.