Të paktën dy persona u vranë dhe shtatë të tjerë u plagosën në një sulm ajror që ushtria ruse kreu në kryeqytetin ukrainas, Kiev, transmeton Anadolu.

Presidenti i Ukrainës, Volodymyr Zelenskyy në një deklaratë me shkrim në llogarinë e tij Telegram tha se rusët sulmuan Kievin me raketa dhe mjete ajrore pa pilot (dronë).

Ai theksoi se ushtria ruse kreu fillimisht një sulm me raketa balistike dhe më pas me dronë ndërsa vuri në dukje se dy persona humbën jetën dhe shtatë të tjerë, përfshirë katër fëmijë u plagosën si pasojë e sulmit.

"Rusët lëshuan katër raketa balistike dhe 142 dronë gjatë natës", tha Zelenskyy duke shtuar se rusët gjatë natës kryen sulme edhe ndaj rajoneve Dnipropetrovsk, Kherson, Zhytomyr, Donetsk dhe Zaporizhia të Ukrainës.

Presidenti ukrainas tha se duhet të ushtrohet presion ndërkombëtar mbi Rusinë për të ndalur sulmet.