Ukraina zhvilloi takime "produktive" me partnerët amerikanë dhe evropianë gjatë tre ditëve në shtetin amerikan të Floridës, si pjesë e përpjekjeve për t'i dhënë fund luftës gati katërvjeçare Rusi-Ukrainë, sipas një deklarate të përbashkët të dielën, transmeton Anadolu

"Delegacioni ukrainas zhvilloi një sërë takimesh produktive dhe konstruktive me partnerët amerikanë dhe evropianë", thuhet në deklaratën e ndarë nga i dërguari special i SHBA-së, Steve Witkoff, në platformën e kompaninë amerikane të mediave sociale X.

Takimi SHBA-Ukrainë u përqendrua në katër dokumente kryesore, duke përfshirë zhvillimin e mëtejshëm të një plani 20-pikësh, përafrimin e qëndrimeve mbi kornizat shumëpalëshe dhe ato të garancisë së sigurisë amerikane për Ukrainën, dhe avancimin e një plani ekonomik dhe prosperiteti për rimëkëmbjen e vendit.

"Vëmendje e veçantë iu kushtua diskutimit të afateve kohore dhe renditjes së hapave të ardhshëm", sipas deklaratës.

Ukraina mbetet “plotësisht e përkushtuar për të arritur paqe të drejtë dhe të qëndrueshme”, me përparësi të përbashkëta për ndalimin e vrasjeve, sigurimin e sigurisë së garantuar dhe krijimin e kushteve për rimëkëmbje, stabilitet dhe prosperitet afatgjatë, shtoi deklarata.

"Paqja nuk duhet të jetë vetëm një ndërprerje e armiqësive, por edhe një themel dinjitoz për një të ardhme të qëndrueshme", thuhet në deklaratë.

Ukraina "vlerëson shumë" udhëheqjen dhe mbështetjen e SHBA-së dhe vazhdimin e koordinimit të ngushtë me partnerët në fazat e ardhshme të kësaj pune, sipas deklaratës.

Takimet janë të fundit në një seri takimesh të fokusuara në një kornizë paqeje.

Të dërguarit e presidentit të SHBA-së, Donald Trump, zhvilluan bisedime me zyrtarë ukrainas dhe evropianë në Gjermani fundjavën e kaluar dhe në fillim të javës.

Në nëntor, SHBA-ja dhe Ukraina u takuan në Gjenevë dhe hartuan një "kornizë të rafinuar paqeje".

Witkoff dhe Jared Kushner, dhëndri i Trumpit dhe këshilltari jozyrtar, më pas u takuan me presidentin rus, Vladimir Putin, në Moskë më 2 dhjetor për të diskutuar draftin.

Më vonë, delegacionet e SHBA-së dhe Ukrainës zhvilluan bisedime pasuese në Florida, të cilat të dyja palët i përshkruan si konstruktive.

Ndërkohë, i dërguari presidencial rus, Kirill Dmitriev, fluturoi gjithashtu për në Miami për bisedime me zyrtarët amerikanë dhe tha se diskutimet po vazhdojnë "në mënyrë konstruktive".