Ukraina dhe Mbretëria e Bashkuar kanë nënshkruar në Kiev një udhërrëfyes që formalizon bashkëpunimin në fushën e mbrojtjes për vitin 2026, në kuadër të Marrëveshjes së Partneritetit Njëqindvjeçar, njoftoi sot ministri i Mbrojtjes i Ukrainës, Denys Shmyhal, transmeton Anadolu.

Në një deklaratë, Shmyhal tha se dokumenti u nënshkrua me Sekretarin britanik të Shtetit për Mbrojtjen, John Healey, dhe mbulon fusha kyçe të sigurisë, duke e cilësuar atë si "një hap të rëndësishëm drejt zbatimit të projekteve në shkallë të gjerë" të mundësuara nga partneriteti afatgjatë mes Ukrainës dhe Mbretërisë së Bashkuar.

Ai tha se zyrtarët ukrainas, së bashku me përfaqësues të komunitetit të inteligjencës dhe Shtabit të Përgjithshëm, e kanë informuar Healeyn për pasojat e sulmit të kombinuar të Rusisë gjatë natës, duke theksuar se forcimi i mbrojtjes ajrore dhe sigurimi i furnizimeve të mjaftueshme me municion mbeten prioritetet kryesore.

Shmyhal e falënderoi Healeyn për vizitën dhe tha se udhërrëfyesi synon t'i shndërrojë angazhimet politike në bashkëpunim praktik në planifikimin e mbrojtjes dhe zhvillimin e kapaciteteve.