Një operacion masiv policor kundër trafikimit të drogës në Rio de Janeiro të Brazilit, që thuhet se është më i madhi në historinë e shtetit, ka rezultuar në vdekjen e të paktën 60 personave, përfshirë katër oficerë të policisë dhe kriminelë të dyshuar, transmeton Anadolu.

Guvernatori i qytetit Rio de Janeiro, Claudio Castro, njoftoi se autoritetet vendosën 2.500 oficerë të policisë për mega-operacionin, i cili synonte të "luftojë zgjerimin territorial" të grupit kriminal Comando Vermelho.

Castro tha se forcat e sigurisë u përballën me rezistencë të madhe, duke përfshirë të shtëna me armë zjarri dhe madje edhe granata të lëshuara nga dronë.

Sipas një raporti të publikuar nga autoritetet, operacioni në vazhdim deri më tani ka arrestuar të paktën 81 persona dhe ka sekuestruar 42 pushkë. Ekipet e zbatimit të ligjit, me 32 automjete të blinduara në orët e para të mëngjesit hynë në komplekset Alemao dhe da Penga, zona që ndodhen në veri të qytetit.

Castro, një aleat politik i ish-presidentit të ekstremit të djathtë, Jair Bolsonaro, konfirmoi se policia gjithashtu sekuestroi "një sasi të madhe droge" atje.

"Pavarësisht sulmeve, forcat e sigurisë mbeten të palëkundura në luftën kundër krimit. Kjo është madhësia e sfidës me të cilën përballemi. Nuk është më një krim i zakonshëm, është narko-terrorizëm", tha Castro.

Ai gjithashtu i këshilloi banorët e lagjeve të prekura të qëndrojnë brenda shtëpive të tyre teksa operacioni vazhdon.

Legjislatura shtetërore tha se "më shumë se 200 mijë banorë vazhdojnë të preken nga shkollat e mbyllura, autobusët e devijuar nga drejtimet e tyre dhe njësitë shëndetësore me shërbime të pezulluara".

Castro gjithashtu ndau një video në rrjetet sociale që tregon një dron që lëshon një predhë.

"Kështu përshëndetet policia e Rio de Janeiros nga kriminelët, me bomba të lëshuara nga dronë", shkroi ai.

Guvernatori i qytetit Rio de Janeiro pretendoi se veprimi aktual është "më i madh se ai i vitit 2010", një vendosje e mëparshme e madhe që pa forcat policore dhe ushtarake të rimarrin kontrollin e të njëjtës zonë pas përleshjeve që lanë rreth 30 të vdekur.

Operacioni po ndodh pavarësisht se qeveria federale braziliane, nën presidentin Luis Inacio Lula da Silva, ka hedhur poshtë një propozim nga SHBA-ja në muajin maj për të klasifikuar Comando Vermelhon si organizatë terroriste. Argumenti zyrtar i Brazilit ishte se këto fraksione nuk kualifikohen si terroriste sipas ligjit kombëtar.