Turqia dhe Etiopia shënojnë një shekull marrëdhëniesh diplomatike
Eventi thekson thellimin e partneritetit strategjik dhe bashkëpunimin rajonal midis dy vendeve
Ankara
Drejtoria e Komunikimit e Turqisë organizoi këtë javë një panel në kryeqytetin e Etiopisë, Addis Ababa për të shënuar një shekull marrëdhënie diplomatike midis dy vendeve, transmeton Anadolu.
Në aktivitetin e titulluar "Marrëdhëniet Turqi-Etiopi: Një Shekull Diplomacie, Miqësi e Përjetshme", morën pjesë Ambasadori i Turqisë në Etiopi, Berk Baran, akademikë, zyrtarë, gazetarë dhe përfaqësues të organizatave ndërkombëtare dhe shoqërisë civile, tha drejtoria në një deklaratë.
Në këtë aktivitet u lexua një mesazh nga drejtori i Komunikimit të Turqisë, Burhanettin Duran. Në mesazhin e tij, Duran tha se marrëdhënia midis Turqisë dhe Etiopisë, e cila ka vazhduar pa ndërprerje përgjatë vijës së një partneriteti strategjik, u thellua më tej pas nismës së presidentit Erdogan për shtrirjen e aktiviteteve në Afrikë, e nisur në vitin 2005.
Duran theksoi se numri i ambasadave të Turqisë në Afrikë është rritur nga 12 në vitin 2005 në 44 në vitin 2026. Ai tha se Turqia i sheh lidhjet e saj me Etiopinë si kontribuese për paqen, stabilitetin dhe prosperitetin e përbashkët në Bririn e Afrikës. Ai theksoi pozicionin unik të Addis Ababës si vend pritës i selisë së Unionit Afrikan dhe një qendër e diplomacisë shumëpalëshe.
Duran e përshkroi panelin si një platformë të vlefshme që ofron një diskutim gjithëpërfshirës të dimensioneve politike, ekonomike dhe kulturore të marrëdhënies, duke marrë në konsideratë si vazhdimësinë historike ashtu edhe dinamikën aktuale rajonale.
Ai nënvizoi pozicionin strategjik të Etiopisë në Bririn e Afrikës, duke vënë në dukje rëndësinë në rritje të rajonit në tregti, siguri dhe stabilitet rajonal. Duran shtoi se lidhjet dypalëshe gjenerojnë vlerë jo vetëm për të dy vendet, por edhe në nivel rajonal.
Panelistët thanë se kontaktet diplomatike midis dy vendeve datojnë që nga viti 1896, me Turqinë që hapi ambasadën e saj të parë rezidente në Afrikën Sub-Sahariane në Addis Ababa në vitin 1926.
Ata nënvizuan rëndësinë e bashkëpunimit mediatik dhe luftimin e dezinformimit për të mbështetur lidhjet e qëndrueshme dypalëshe dhe stabilitetin rajonal.
