Mes një vale sulmesh në Evropë nga mbështetësit e grupit terrorist PKK, Türkiye u bëri thirrje vendeve evropiane t'i ndjekin ata me shpejtësi, duke thënë se pret që vendet në fjalë t'i nxjerrin sulmuesit para drejtësisë, transmeton Anadolu.

Të martën vonë, mbështetësit e PKK-së sulmuan hyrjen e Konsullatës së Përgjithshme të Türkiyes në Hannover të Gjermanisë. Askush nuk u vra apo u plagos, por pati dëmtime në ndërtesë, të cilën siguria gjermane është e detyruar ta mbrojë si përfaqësi zyrtare e Türkiyes në vend.

Në një deklaratë, Ministria e Jashtme turke tha: "Pas sulmit, zyrtarët gjermanë u kontaktuan dhe u kujtuan se ata janë përgjegjës për sigurinë e qytetarëve tanë dhe misioneve diplomatike dhe se provokimet kundër komunitetit turk në Evropë nuk duhet të tolerohen".

"Organizata terroriste PKK, tashmë e futur në qoshe, po intensifikon veprimet e saj kundër komunitetit turk në Evropë. Është falë sensit të përbashkët të qytetarëve tanë që këto provokime nuk kanë çuar në incidente më të rënda", shtoi më tej ministria.

"Presim që vendet relevante të tregojnë zero tolerancë për veprimet e mbështetësve të organizatës terroriste dhe të nxjerrin autorët para drejtësisë sa më shpejt të jetë e mundur", thuhet në deklaratë.

Sulmi ndaj konsullatës, i cili ndodhi gjatë një marshimi të mbështetësve të PKK-së terroriste, pasoi veprime të ngjashme në ditët e fundit si në Hamburg ashtu edhe në Belgjikë, përfshirë sulmet ndaj turqve vendas.

Në fushatën e saj terroriste më shumë se 35-vjeçare kundër Türkiyes, PKK-ja e listuar si organizatë terroriste nga Türkiye, SHBA-ja dhe BE-ja ka qenë përgjegjëse për vdekjen e mbi 40 mijë njerëzve, përfshirë gra, fëmijë dhe foshnja.

Edhe pse zyrtarisht e jashtëligjshme në Bashkimin Evropian dhe në shtetet anëtare individuale, në praktikë PKK-së terroriste i është lejuar të protestojë, të mbledhë fonde për fushatën e saj terroriste dhe të kërcënojë ose sulmojë vendasit në vendet evropiane.

Türkiye ka dënuar prej kohësh tolerancën ndaj grupit terrorist dhe mbështetësve të tij në Evropë.