Kompania ajrore turke Turkish Airlines njoftoi të premten se ka anuluar gjithsej 17 fluturime të planifikuara për të premten dhe të shtunën në qytetet iraniane të Teheranit, Tabrizit dhe Mashhadit, transmeton Anadolu.

Në një deklaratë, linja ajrore theksoi se "Për shkak të zhvillimeve rajonale në Iran, janë anuluar gjithsej 17 fluturime të planifikuara për të premten, 9 janar dhe të shtunën, 10 janar, në Teheran, Tabriz dhe Mashhad".

Pasagjerëve iu këshillua të kontrollojnë statusin e fundit të fluturimeve të tyre përmes faqes zyrtare të internetit të linjës ajrore.

Irani ka përjetuar valë protestash që nga fundi i dhjetorit, duke filluar më 28 dhjetor në Pazarin e Madh të Teheranit për shkak të zhvlerësimit të ndjeshëm të rialit iranian dhe përkeqësimit të kushteve ekonomike. Demonstratat më vonë u përhapën në disa qytete të tjera në të gjithë vendin.

Autoritetet iraniane nuk kanë publikuar shifra zyrtare të viktimave. Megjithatë, Agjencia e Lajmeve të Aktivistëve të të Drejtave të Njeriut (HRANA) raportoi në ditën e 12-të të protestave se 42 persona janë vrarë, përfshirë 8 personel sigurie, me dhjetëra të plagosur dhe 2.277 të arrestuar.