Presidenti i SHBA-së, Donald Trump nënshkroi të enjten një urdhër ekzekutiv i cili udhëzon që astronautët amerikanë të kthehen në Hënë deri në vitin 2028, transmeton Anadolu.

Në një deklaratë nga Shtëpia e Bardhë thuhet se urdhri parashikon dërgimin e astronautëve përsëri në sipërfaqen hënore deri në vitin 2028 - viti i fundit i plotë i presidencës së Trumpit, sipas Kushtetutës dhe krijimin e elementëve të parë të një baze të përhershme në Hënë deri në vitin 2030.

Deklarata thekson se urdhri synon të forcojë lidershipin e SHBA-së në hapësirë, duke avancuar sigurinë kombëtare dhe interesat tregtare. Planet përfshijnë vendosjen e reaktorëve bërthamorë në sipërfaqen e Hënës dhe në orbitë.

Shtëpia e Bardhë tha se teknologjitë hapësinore të gjeneratës së ardhshme pritet të kontribuojnë në fusha të tilla si bujqësia precize, parashikimi i motit, siguria e aviacionit dhe qasja globale në internet me brez të gjerë. Një reaktor bërthamor në sipërfaqen hënore, gati për lëshim, është planifikuar të zhvillohet deri në vitin 2030.

Më tej thuhet se aftësitë e SHBA-së për të zbuluar dhe kundërshtuar kërcënimet e sigurisë ndaj aseteve hapësinore do të përmirësohen, pasi siguria hapësinore është kritike për mbrojtjen kombëtare dhe sovranitetin ekonomik. Administrata planifikon të nxisë një ekonomi të gjallë hapësinore të drejtuar nga sipërmarrja e lirë dhe të mundësojë aftësitë hapësinore të gjeneratës së ardhshme.

Urdhri ekzekutiv është hartuar për të inkurajuar inovacionin dhe investimet në sektorin privat duke forcuar infrastrukturën e lëshimit dhe duke zhvilluar një plan veprimi komercial për të zëvendësuar Stacionin Ndërkombëtar Hapësinor deri në vitin 2030.

Në maj, administrata e Trumpit rekomandoi shkurtimin e buxhetit shkencor të agjencisë hapësinore amerikane NASA pothuajse përgjysmë, duke e detyruar atë të anulojë jo më pak se 41 misione hapësinore, përfshirë anijet kozmike të paguara tashmë, të lëshuara dhe që bëjnë zbulime.

Direktiva e re mbyll një vit të trazuar për NASA-n, e cila ka qenë nën administratorë në detyrë për pjesën më të madhe të vitit, jo drejtues të miratuar siç duhet nga Kongresi. Kreu i sapo konfirmuar i agjencisë, Jared Isaacman ka një histori si astronaut privat, por është kritikuar për lidhjet e tij me manjatin Elon Musk.