Duke pretenduar se Irani është dobësuar rëndë, presidenti i Shteteve të Bashkuara, Donald Trump, tha të premten se nuk e mbështet një armëpushim në luftën në vazhdim mes SHBA-së dhe Izraelit në njërën anë dhe Iranit në anën tjetër, transmeton Anadolu.

“Nuk dua armëpushim. E dini, nuk bën armëpushim kur po e shkatërron plotësisht palën tjetër”, u tha Trump gazetarëve para se të largohej nga Shtëpia e Bardhë.

I pyetur nëse Izraeli do të ishte i gatshëm t’i jepte fund luftës në të njëjtën kohë me Washingtonin, Trump u përgjigj: “Mendoj se po. Marrëdhënia është shumë e mirë… Ne duam, pak a shumë, të njëjtat gjëra… Ne duam fitore, të dyja”.

Këto deklarata erdhën disa orë pasi Trump tha se po kërkon bisedime me Iranin, por pretendoi se “nuk ka askënd me kë të bisedohet” pas javësh sulmesh nga SHBA-ja dhe Izraeli që kanë vrarë zyrtarë të lartë iranianë, përfshirë edhe ish-Udhëheqësin Suprem Ali Khamenei dhe zyrtarin e lartë Ali Larijani.

Irani gjithashtu hodhi poshtë bisedimet për armëpushim, me ministrin e Jashtëm Abbas Araghchi që tha këtë javë se SHBA-ja është “përgjegjëse” për luftën dhe ndikimin e saj në rajon.

Gjatë deklaratave në Shtëpinë e Bardhë, Trump minimizoi edhe varësinë e SHBA-së nga Ngushtica e Hormuzit, një pikë kyç globale për transportin e naftës, përmes së cilës kalon një pjesë e konsiderueshme e furnizimeve botërore me naftë.

“Ne nuk e përdorim ngushticën… Nuk na duhet. Evropa ka nevojë për të. Koreja (e Jugut), Japonia, Kina… Kështu që ato do të duhet të përfshihen pak”, shtoi ai.

Kjo rrugë ujore ka qenë në qendër të shqetësimeve globale për energjinë që kur Garda Revolucionare Islamike e Iranit njoftoi mbylljen e saj për shumicën e anijeve, në kundërpërgjigje ndaj sulmeve të SHBA-së dhe Izraelit që nisën më 28 shkurt.

Pasi Trump bëri thirrje për ndihmë ndërkombëtare për rihapjen e ngushticës, shumë vende refuzuan, duke thënë se SHBA-ja e nisi luftën aktuale pa konsultim ndërkombëtar dhe se ajo i përket Trumpit.

Tensionet rajonale janë rritur ndjeshëm që kur SHBA-ja dhe Izraeli nisën sulme të përbashkëta ndaj Iranit më 28 shkurt. Sipas raportimeve, sulmet kanë vrarë rreth 1.300 persona, përfshirë mbi 150 fëmijë në një shkollë fillore për vajza.

Irani është kundërpërgjigjur me sulme me raketa dhe dronë që kanë shënjestruar Izraelin dhe ato që i konsideron si objektiva të lidhura me SHBA-në në gjithë rajonin, duke përshkallëzuar më tej konfliktin.