Presidenti amerikan Donald Trump kritikoi BE-në dhe u zotua të zbatojë "shumë shpejt" tarifat prej 25 për qind mbi eksportet e bllokut 27-anëtarësh, raporton Anadolu.

BE-ja, tha Trump, "u formua me qëllim që të prishë Shtetet e Bashkuara. Ky është qëllimi i saj dhe ata kanë bërë një punë të mirë. Por tani unë jam president".

"Ata me të vërtetë kanë përfituar nga ne në një mënyrë tjetër", u tha Trump gazetarëve kur thirri mbledhjen e tij të parë të kabinetit që nga marrja e detyrës në janar.

"Ata nuk i pranojnë makinat tona. Ata nuk pranojnë, në thelb, produktet tona bujqësore. Ata përdorin të gjitha arsyet për të mos e bërë këtë, dhe ne pranojmë gjithçka prej tyre, dhe kemi një deficit prej 300 miliardë dollarësh me Bashkimin Evropian", theksoi presidenti amerikan, duke shtuar se megjithatë "i do vendet e Evropës" dhe se ka prejardhje nga atje.

Trump tha se taksat e reja të importit do të vendosen për "makinat dhe të gjitha gjërat e tjera".

Komentet vijnë pasi Trump priti presidentin francez Emmanuel Macron në Shtëpinë e Bardhë të hënën, përpara një vizite të kryeministrit të Mbretërisë së Bashkuar Keir Starmer planifikuar për të enjten.

BE-ja është partneri i tretë më i madh tregtar i SHBA-së.

Eksportet e SHBA në 27 shtetet anëtare të BE-së arritën në 350,8 miliardë dollarë, ndërsa importet ishin 553,3 miliardë dollarë në 2022, viti i fundit për të cilin Përfaqësuesi i Tregtisë i SHBA-së ka të dhëna. Kjo përbën një deficit tregtar afërsisht 200 miliardë dollarë, por kjo nuk përbën pasqyrën e plotë, megjithatë, me SHBA-në që kanë një avantazh prej 70 miliardë dollarësh në tregtinë e shërbimeve.

Sipas të dhënave të Komisioni Evropian, gjithashtu ka më shumë investime të huaja direkte që rrjedhin në SHBA nga Evropa sesa anasjelltas, në shumën prej 210 miliardë dollarësh.

Presidenti i SHBA-së nënshkroi një urdhër ekzekutiv më 13 shkurt që detyron "tarifat reciproke" ndaj vendeve të huaja, që të përputhen me detyrimet e importit. Këto do të ishin tarifa shtesë nga tarifat që ai po zbaton për vendet në mbarë botën.

Trump ka veçuar taksat e TVSH-së (tatimin mbi vlerën e shtuar) të vendosura mbi eksportet e SHBA-së dhe taksat e konsumit të vendosura nga Britania e Madhe dhe BE-ja, si objektiva specifike për përpjekjet e tij tarifore globale.