Administrata e presidentit amerikan, Donald Trump, po shqyrton plane për të pushtuar ose bllokuar Ishullin Kharg të Iranit si pjesë e një përpjekjeje më të gjerë për të ushtruar presion mbi Teheranin që të rihapë Ngushticën e Hormuzit, transmeton Anadolu.

Kjo vjen derisa Shtëpia e Bardhë kërkon mënyra për të zbutur kontrollin e Iranit mbi një nga rrugët më kritike detare në botë.

Siç raporton Axios, duke cituar burime të njohura me diskutimet, Trump ka arritur në përfundimin se nuk mund ta përfundojë konfliktin sipas kushteve të tij të preferuara nëse nuk reduktohet aftësia e Iranit për të penguar trafikun nëpër ngushticë.

Ndërkohë, çmimet globale të energjisë kanë vazhduar të rriten.

Ishulli Kharg, i vendosur rreth 15 milje larg bregdetit të Iranit, është një qendër kyçe për industrinë e naftës së vendit dhe përpunon rreth 90 për qind të eksporteve të tij të naftës bruto.

Çdo operacion amerikan në ishull, thuhet në raport, mund t’i vendosë trupat amerikane “më drejtpërdrejtë në vijën e zjarrit”.

Sipas një burimi, një veprim i tillë me shumë gjasë mund të ndodhë vetëm pasi ushtria amerikane të dobësojë më tej kapacitetet e Iranit rreth Ngushticës së Hormuzit.

“Na duhet rreth një muaj për t’i dobësuar më shumë iranianët me sulme, për të marrë ishullin dhe më pas për t’i vënë nën presion dhe për ta përdorur këtë në negociata”, tha burimi.

Planifikimi për një skenar të tillë do të kërkonte gjithashtu trupa shtesë amerikane në rajon.

Sipas një zyrtari amerikan, tre njësi të marinsave janë tashmë në rrugë, ndërsa Shtëpia e Bardhë dhe Pentagoni po shqyrtojnë vendosjen e forcave të tjera.

Një zyrtar i lartë i administratës tha se prioriteti i Trumpit mbetet rikthimi i qasjes në ngushticë.

“Ai dëshiron që Hormuzi të jetë i hapur. Nëse duhet të marrë Ishullin Kharg për ta bërë këtë, kjo do të ndodhë. Nëse vendos për një pushtim bregdetar, kjo do të ndodhë. Por ky vendim ende nuk është marrë”, tha zyrtari për Axios.

“Kemi pasur gjithmonë trupa në terren në konflikte nën çdo president, përfshirë nën Trumpin. E di që kjo është një çështje e theksuar në media dhe e kuptoj politikën, por presidenti do të bëjë atë që është e drejtë”, theksoi një zyrtar tjetër i lartë, duke shtuar se ende nuk është marrë asnjë vendim.

Senatori Tom Cotton argumentoi se çdo përpjekje e Iranit për të mbyllur Ngushticën e Hormuzit do të sinjalizonte dobësi dhe jo forcë, duke shtuar se Trumpi ka opsione të shumta rezervë për një skenar të tillë.

Megjithatë, mbeten pikëpyetje nëse goditja e Ishullit Kharg do të arrinte objektivat më të gjera të Washingtonit.

Edhe pse ishulli është thelbësor për rrjetin e eksporteve të naftës së Iranit, disa zyrtarë dhe analistë paralajmërojnë se marrja e tij mund të mos e detyrojë domosdoshmërisht Teheranin të pranojë paqen sipas kushteve të Trumpit.

Admirali në pension, Mark Montgomery, tha për Axios se një operacion i tillë mund t’i vendosë trupat amerikane në rrezik të konsiderueshëm pa ofruar një përfitim të qartë strategjik.

“Nëse marrim Ishullin Kharg, ata do të mbyllin furnizimin nga ana tjetër. Nuk është sikur ne kontrollojmë prodhimin e tyre të naftës”, tha ai.

Montgomery tha se një rrugë më pak e rrezikshme duket më e mundshme.

Sipas tij, pas rreth dy javësh të tjera sulmesh për të dobësuar kapacitetet ushtarake të Iranit, SHBA-ja ka më shumë gjasa të vendosë anije luftarake dhe avionë në ngushticë për të mbrojtur trafikun e cisternave, duke e bërë të panevojshëm një sulm tokësor.