Presidenti i SHBA-së, Donald Trump tha se pret të flasë së shpejti me presidentin rus, Vladimir Putin, duke mbajtur optimizmin lidhur me perspektivat e përfundimit të konfliktit në Ukrainë, transmeton Anadolu.

Trump tha se po zhvillon "një dialog shumë të mirë" me Putinin, por u ankua se 7.014 njerëz u vranë vetëm këtë javë në luftën e Rusisë kundër Ukrainës. Ai përsëriti qëndrimin e tij prej kohësh se mendonte se do të ishte në gjendje ta përfundonte shpejt luftën ruse.

"Do ta bëjmë", tha Trump ndërsa priti drejtuesit e teknologjisë në Shtëpinë e Bardhë. "Kjo doli më e vështirë, por do ta bëjmë", shtoi presidenti amerikan.

"E kam ndjekur, e kam parë dhe kam folur për këtë me presidentin Putin dhe presidentin Zelenskyy. Diçka do të ndodhë, por ata ende nuk janë gati. Por, diçka do të ndodhë", theksoi Trump në intervistën për CBS News.

Ai të enjten u bëri thirrje udhëheqësve evropianë të ndalojnë blerjen e naftës ruse për të ushtruar presion mbi Moskën që t'i japë fund luftës së saj në Ukrainë. "Presioni ekonomik duhet të ushtrohet mbi Kinën për financimin e përpjekjeve të luftës së Rusisë", ka thënë Trump sipas një zyrtari të Shtëpisë së Bardhë.