Numri i të vdekurve nga sulmet hakmarrëse të Iranit ndaj Izraelit është rritur në të paktën tre, me 91 të tjerë të plagosur, transmeton Anadolu.

Sipas raportimeve të mediave izraelite, një grua që u plagos në valën e parë të sulmeve me raketa nga Irani, ndërroi jetë nga plagët e marra.

Dy izraelitë të tjerë që u plagosën në një sulm të mëvonshëm me raketa në Izraelin qendror gjithashtu janë shpallur të vdekur.

Numri i izraelitëve të plagosur në sulmet iraniane gjithashtu është rritur në 91, prej të cilëve 21 janë plagosur në valën e fundit të sulmeve me raketa, ndër të cilët tre janë në gjendje kritike ose serioze.

Channel 12 raportoi se rreth 300 izraelitë në zonën e Tel Avivit të Madh u evakuuan pasi shtëpitë e tyre u dëmtuan, ndërsa 100 izraelitë u evakuuan në bashkinë Ramat Gan pranë Tel Avivit.

Sipas të përditshmes Haaretz, raketat iraniane shkatërruan plotësisht nëntë ndërtesa dhe shkaktuan dëme në qindra apartamente dhe automjete në Ramat Gan.

Lufta e mbrojtjes ajrore u pa edhe mbi kryeqytetin iranian Teheran pas sulmeve të rinovuara izraelite.

Në orët e para të së premtes, forcat izraelite sulmuan Iranin, duke goditur objekte bërthamore dhe raketore dhe duke vrarë komandantë të lartë ushtarakë dhe shkencëtarë. Irani u përgjigj me raketa balistike që shënjestronin disa zona në të gjithë Izraelin.