Ushtria izraelite vrau të paktën njëmbëdhjetë palestinezë dhe plagosi disa të tjerë në të gjithë Rripin e Gazës që nga agimi i së mërkurës, thanë burime mjekësore dhe dëshmitarë okularë për Anadolu.

Në qytetin e Gazës, dy palestinezë u vranë dhe të tjerë u plagosën kur një sulm ajror izraelit goditi një shtëpi në lagjen Al-Daraj në qendër të qytetit.

Nëntë persona të tjerë u plagosën kur avionët luftarakë goditën një tendë pranë varrezave Sheikh Radwan në veri të qytetit.

Në Gazën jugore, dy gra u vranë në një sulm izraelit ndaj tendave që strehonin familjet e zhvendosura në kampin AAl-Qadisiyah në perëndim të Khan Younis.

Në Khan Younis gjithashtu, tre palestinezë të tjerë, përfshirë një fëmijë dhe një grua e re, u vranë dhe të tjerë u plagosën kur një sulm izraelit goditi një tendë që strehonte njerëz të zhvendosur në zonën Asdaa në veri të qytetit.

Ushtria izraelite qëlloi dhe vrau katër palestinezë dhe plagosi të tjerë, ndërsa ata po prisnin ndihmë humanitare në perëndim të Khan Younis në Rripin jugor të Gazës.

Dëshmitarët raportuan gjithashtu se forcat izraelite po shkatërrojnë shtëpi dhe prona civile në disa pjesë të enklavës, së bashku me sulmet ajrore.

Izraeli ka vrarë gati 63.000 palestinezë në Gaza që nga tetori i vitit 2023. Fushata ushtarake e ka shkatërruar enklavën, e cila po përballet me zi buke.

Nëntorin e kaluar, Gjykata Ndërkombëtare Penale lëshoi ​​urdhërarreste për kryeministrin izraelit, Benjamin Netanyahu dhe ish-ministrin e Mbrojtjes, Yoav Gallant, për krime lufte dhe krime kundër njerëzimit në Gaza.

Izraeli përballet gjithashtu me një padi për gjenocid në Gjykatën Ndërkombëtare të Drejtësisë për luftën e tij në enklavë.