Të paktën 46 të vrarë dhe dhjetëra të plagosur në sulmet e fundit izraelite në Rripin e Gazës
Sulmet kishin në shënjestër shtëpi, tenda me civilë të zhvendosur dhe qendra të kujdesit mjekësor.
Gaza/Stamboll
Të paktën 46 civilë u vranë dhe dhjetëra të tjerë u plagosën në sulmet e fundit izraelite në Rripin e Gazës të enjten, sipas burimeve mjekësore, transmeton Anadolu.
Në sulmet e fundit, një dron izraelit goditi një grup civilësh në Jabalia në veri të Gazës, duke lënë tre të vdekur, tha një burim mjekësor.
Forcat e ushtrisë vranë gjithashtu dy palestinezë që prisnin të merrnin ndihmë humanitare pranë një pike shpërndarjeje në al-Sudaniya në veriperëndim të Qytetit të Gazës.
Tre persona humbën jetën dhe disa të tjerë u plagosën kur avionët luftarakë goditën një apartament banimi në perëndim të Qytetit të Gazës, tha një burim tjetër mjekësor.
Gjashtë persona të tjerë, përfshirë një grua, u vranë dhe disa të tjerë u plagosën në dy sulme të ndara në të njëjtin qytet.
Forcat izraelite bombarduan një grup civilësh që prisnin pranë një vendi të kujdesit mjekësor për shpërndarjen e suplementeve ushqimore në qytetin qendror Deir al-Balah, duke vrarë 17 persona, kryesisht gra dhe fëmijë, dhe duke plagosur të tjerë, thanë mjekët.
Veçmas, katër persona nga e njëjta familje u vranë në një sulm izraelit që synoi shtëpinë e tyre në kampin e refugjatëve Bureij në pjesën qendrore të Rripit të Gazës.
Dy palestinezë u vranë gjithashtu dhe dhjetë të tjerë u plagosën në sulmet izraelite me dronë në kampin qendror të refugjatëve Nuseirat.
Në jug të Rripit të Gazës, ushtria izraelite vrau pesë persona, përfshirë dy fëmijë, dhe plagosi 20 të tjerë në sulmet ndaj tendave që strehonin palestinezë të zhvendosur në zonën Al-Mawasi të Khan Younisit.
Një nënë dhe tre nga fëmijët e saj u vranë gjithashtu kur ushtria izraelite goditi shtëpinë e tyre në Khan Younis. Më shumë se 20 persona u plagosën në të njëjtin sulm.
Ushtria izraelite ka vrarë gati 57.700 palestinezë në Gaza që nga tetori 2023, shumica prej tyre gra dhe fëmijë. Bombardimet e pamëshirshme e kanë shkatërruar enklavën dhe kanë çuar në mungesë ushqimi dhe përhapje sëmundjesh.
Nëntorin e kaluar, Gjykata Ndërkombëtare Penale lëshoi urdhra arresti për kryeministrin izraelit Benjamin Netanyahu dhe ish-ministrin e tij të Mbrojtjes Yoav Gallant për krime lufte dhe krime kundër njerëzimit në Gaza.
Izraeli gjithashtu përballet me një padi për gjenocid në Gjykatën Ndërkombëtare të Drejtësisë për luftën e tij në enklavën palestineze.
