GAZA (AA) - Të paktën 15 civilë janë vrarë dhe disa të tjerë janë plagosur në sulmet izraelite në të gjithë Rripin e Gazës që nga mëngjesi i sotëm, sipas burimeve mjekësore, transmeton Anadolu.

Sulmet izraelite vranë pesë persona në lagjen Al-Saftawi në veri të qytetit të Gazës.

Gjashtë të tjerë u vranë dhe dhjetëra të tjerë u plagosën në disa sulme izraelite në lagjet Tel al-Hawa, al-Tuffah dhe Shujaiya të të njëjtit qytet.

Në enklavën qendrore, ushtria izraelite shënjestroi një automjet të përdorur për shpërndarjen e ujit në kampin e refugjatëve Nuseirat, duke vrarë një person dhe duke plagosur të tjerë.

Dronët vetëvrasës izraelitë vranë një palestinez dhe plagosën të tjerë në një tendë që strehonte palestinezë të zhvendosur në zonën Al-Mawasi të Khan Younis.

Dy të tjerë u vranë nga të shtënat izraelite ndërsa prisnin ndihmë në një vend shpërndarjeje ndihmash SHBA-Izrael në perëndim të qytetit Rafah, në jug të Rripit të Gazës.

Duke refuzuar thirrjet ndërkombëtare për armëpushim, Izraeli ka ndërmarrë një ofensivë brutale ndaj Gazës që nga tetori i vitit 2023, duke vrarë mbi 58.000 palestinezë, shumica prej tyre gra dhe fëmijë. Bombardimet e pamëshirshme kanë shkatërruar enklavën dhe kanë çuar në mungesë ushqimi dhe sëmundje.

Nëntorin e kaluar, Gjykata Ndërkombëtare Penale lëshoi urdhërarreste për kryeministrin izraelit, Benjamin Netanyahu dhe ish-ministrin e tij të Mbrojtjes, Yoav Gallant për krime lufte dhe krime kundër njerëzimit në Gaza.

Izraeli përballet gjithashtu me një padi për gjenocid në Gjykatën Ndërkombëtare të Drejtësisë për luftën e tij në enklavë.