Një sulm ajror izraelit plagosi 11 anëtarë të mbrojtjes civile pranë qendrës rajonale Nabatieh në Libanin jugor, transmeton Anadolu.

Sipas raportimit të mërkurën nga Agjencia Kombëtare e Lajmeve NNA, Drejtoria e Përgjithshme e Mbrojtjes Civile e vendit njoftoi se 11 anëtarë të mbrojtjes civile nga qendra rajonale Nabatieh u plagosën me shkallë të ndryshme plagësh pasi një sulm ajror izraelit shënjestroi një ndërtesë rreth 20 metra nga qendra të martën në mbrëmje.

Sulmi shkaktoi gjithashtu "dëme të konsiderueshme" në qendër dhe automjetet e saj, sipas deklaratës.

Mbrojtja Civile tha se ekipet e saj mbeten në gatishmëri të plotë dhe do të vazhdojnë të kryejnë detyrat e tyre pavarësisht rreziqeve dhe sfidave në rritje.

Izraeli gjithashtu nisi një ndërhyrje të kufizuar tokësore në Libanin jugor më 3 mars, pasi nisi një fushatë të përbashkët ushtarake me SHBA-në kundër Iranit më 28 shkurt.