Ministrja suedeze e Punëve të Jashtme, Maria Malmer Stenergard, ka paralajmëruar se plani i Izraelit për të pushtuar Gazën ngre shqetësime serioze dhe mund të përbëjë një shkelje të ligjit ndërkombëtar, transmeton Anadolu.

"E shoh me shqetësim të madh vendimin që ka marrë qeveria izraelite. Nevojitet një armëpushim dhe ky vendim rrezikon ta çojë zhvillimin në drejtimin e kundërt", tha ajo për transmetuesin publik suedez SVT.

Stenergard theksoi se çdo përpjekje nga Izraeli për të aneksuar ose ndryshuar territorin e Gazës do të ishte e paligjshme.

"Më parë kam përsëritur se çdo përpjekje për të aneksuar, ndryshuar ose zvogëluar territorin e Gazës do të shkelte ligjin ndërkombëtar", shtoi ajo.

Sipas zyrës së kryeministrit Benjamin Netanyahut, forcat izraelite do të përgatiten për të pushtuar Qytetin Gaza. Imazhet e fundit satelitore zbulojnë se ushtria izraelite po grumbullon trupa dhe pajisje pranë kufirit të Gazës, potencialisht në përgatitje për një pushtim të ri tokësor të territorit palestinez.

Operacionet tokësore izraelite në Gaza kanë vazhduar që nga tetori i vitit 2023, me ndërprerje gjatë dy armëpushimeve.

Kabineti i Sigurisë Izraelite gjithashtu miratoi pesë parime kryesore për përfundimin e luftës, shpërbërjen e grupit palestinez Hamas, sigurimin e kthimit të të gjithë pengjeve si ato të gjallë ashtu edhe ato të vdekur, demilitarizimin e Rripit të Gazës, sigurimin e kontrollit të sigurisë izraelite mbi zonën dhe krijimin e një qeverie civile që nuk drejtohet nga Hamasi ose Autoriteti Palestinez.

Ky operacion i ri nga Izraeli, që pritet të zgjasë të paktën gjashtë muaj, vjen pavarësisht se Tel Avivi përballet me zemërim në rritje për luftën shkatërruese në Gaza, ku të paktën 61.200 palestinezë janë vrarë që nga tetori i vitit 2023. Fushata ushtarake ka shkatërruar enklavën, e cila po përballet me uri.

Nëntorin e kaluar, Gjykata Ndërkombëtare Penale lëshoi urdhërarreste ndaj Netanyahut dhe ish-ministrit të Mbrojtjes, Yoav Gallant, duke i akuzuar për krime lufte dhe krime kundër njerëzimit në Gaza. Izraeli gjithashtu përballet me një padi gjenocidi në Gjykatën Ndërkombëtare të Drejtësisë për luftën në enklavë.