Roja Bregdetare Suedeze hipi në një cisternë nafte të dyshuar si "flotë në hije" në Detin Baltik pranë qytetit portual jugor të Trelleborg, thanë sot autoritetet, transmeton Anadolu.

Operacioni kishte në shënjestër "Sea Owl 1", një cisternë 228 metra që lundronte nën flamurin e Komoros, e cila dyshohej se operonte nën një flamur të rremë ndërsa ishte në listën e sanksioneve të BE-së, raportoi transmetuesi suedez i lajmeve SVT.

Roja Bregdetare Suedeze tha se anija u hip në bord të enjten në mbrëmje jashtë Trelleborg me ndihmën e policisë dhe Task forcës kombëtare. Sipas prokurorit të lartë Adrien Combier-Hogg, komandanti i anijes, një shtetas rus, dyshohet për disa krime.

"I dyshuari është komandanti në bordin e anijes 'Sea Owl 1' dhe një shtetas rus", tha Combier-Hogg në një deklaratë, duke shtuar se hetimi ka të bëjë me dyshimet për përdorimin e dokumenteve të rreme dhe shkelje të tjera të ligjit detar.

Ai tha se autoritetet po kryejnë një hetim intensiv, përfshirë kërkime në bordin e anijes, marrje në pyetje dhe ekzaminime të dokumenteve të dyshuara të falsifikuara. Zyrtari për mediat i Rojës Bregdetare Suedeze, Mattias Lindholm tha se cisterna po shkonte drejt Rusisë.

"Vlerësimi ynë i përgjithshëm është se rreziku i mangësive të sigurisë në bord është i lartë", tha Daniel Stenling, zëvendësshef i operacioneve në Rojën Bregdetare. Autoritetet thanë se operacioni përfshinte ekipin e hipjes në bord të Rojës Bregdetare, Task forcën kombëtare të policisë dhe një helikopter policie.

Më 6 mars, autoritetet suedeze morën kontrollin e një tjetër cisterne "Caffa" jashtë Trelleborgut. Kapiteni i saj dyshohet për shkelje të ngjashme të rregulloreve detare dhe përdorimin e dokumenteve të falsifikuara dhe që atëherë anija është vendosur nën një ndalim përdorimi ndërkombëtar nga Agjencia Suedeze e Transportit.