MADRID (AA) - Në Spanjë e cila po lufton kundër zjarreve pyjore që nga fillimi i gushtit, janë djegur mbi 344 mijë hektarë këtë vit, sipas të dhënave nga Sistemi Evropian i Informacionit për Zjarret në Pyje (EFFIS), pjesë e Programit Evropian të Monitorimit të Mjedisit "Copernicus", transmeton Anadolu.

EFFIS njoftoi se që nga 1 janari nga zjarret pyjore në Spanjë janë prekur negativisht 344.417 hektarë sipërfaqe. Deklarata vuri në dukje se një pjesë e madhe e 300 mijë hektarëve janë djegur në tre javët e fundit.

Krahasuar me të dhënat kombëtare, Spanja po përjeton zjarret më të mëdha pyjore të 31 viteve të fundit, ndërsa në vitin 1994 në vend dogjën 437.602 hektarë. Aktualisht, zjarret po vazhdojnë në 23 lokacione të vendit, në rajonet Galicia (Ourense), Castile dhe Leon (Leon dhe Zamora), Asturias në veri dhe Extremadura (Caceres) në jug.

Mbrojtja Civile dhe zyrtarët e qeverisjes vendore thanë se 5.300 persona në 76 vendbanime në Castile dhe Leon, të cilët u evakuuan si masë paraprake, ende po kalojnë natën në palestra, strehimore ose tek miqtë dhe të afërmit e tyre.

Sipas të dhënave nga Ministria e Brendshme, që nga fillimi i gushtit e deri më tani janë evakuuar 31.130 persona të prekur nga zjarret. Deri më tani, janë nisur 92 hetime dhe janë ndaluar 31 persona lidhur me zjarret, të cilat kanë marrë jetën e katër personave.

Kryeministri Pedro Sanchez më 17 gusht vizitoi rajonet më të goditura Ourense dhe Leon ndërsa nesër do të vizitojë Zamora dhe Caceres.

Në Spanjë, ku zjarret kanë vazhduar prej ditësh për shkak të erërave të forta dhe temperaturave të larta që arrijnë në 44 gradë Celsius, parashikohet se do të duhen të paktën dy deri në tre ditë të tjera për të vënë flakët nën kontroll.