Spanja thirri sot të ngarkuarin me punë të Izraelit për të protestuar pasi policia izraelite pengoi një klerik të lartë katolik të kremtonte Meshën e së Dielës së Palmave në Kishën e Varrit të Shenjtë në Kuds, transmeton Anadolu.

Ministri i Jashtëm spanjoll, Jose Manuel Albares tha se Madridi shprehu zyrtarisht protestën për incidentin, duke e quajtur atë "shumë shqetësues" dhe "të papranueshëm".

"Kjo nuk mund të ndodhë përsëri. Lutja katolike duhet të lejohet të zhvillohet normalisht, siç ka ndodhur historikisht", i tha ai transmetuesit spanjoll RAC1.

Përfaqësimi më i lartë diplomatik i Izraelit në Spanjë ka qenë i ngarkuari me punë që nga viti 2024, kur tërhoqi ambasadorin e saj pasi Madridi njohu shtetësinë palestineze.

Ky veprim vjen pas ngjarjeve të së dielës kur policia izraelite ndaloi kardinalin Pierbattista Pizzaballa të hynte në kishë, një nga vendet më të shenjta të krishterimit, ku ai duhej të drejtonte një shërbesë të së Dielës së Palmave që shënonte fillimin e Javës së Shenjtë.

Albares tha se incidenti pasqyron një model më të gjerë kufizimesh që prekin besime të shumta. "Kjo nuk është e re. Muslimanëve gjithashtu nuk u është lejuar hyrja në vendet e shenjta. Ka patur një sërë pengesash që prekin fe të ndryshme, përfshirë adhurimin e krishterë dhe katolik", tha ai.

Autoritetet katolike thanë se ishte hera e parë në shekuj që një Patriark Latin ishte penguar të hynte në vend të Dielën e Palmave. "Ky vendim i nxituar dhe thelbësisht i gabuar, i njollosur nga konsiderata të papërshtatshme, përfaqëson një largim ekstrem nga parimet themelore të arsyeshmërisë, lirisë së adhurimit dhe respektit për 'status quo'-në", tha Patriarkana Latine e Kudsit në një deklaratë.

Kryeministri izraelit Benjamin Netanyahu fillimisht tha se masa u mor nga shqetësimi për sigurinë e patriarkut, duke përmendur shënjestrimin iranian të vendeve të shenjta në ditët e fundit.

Megjithatë, pas kritikave nga presidenti francez Emmanuel Macron, kryeministrja italiane Giorgia Meloni, kryeministri spanjoll Pedro Sanchez dhe zyrtarë amerikanë, Netanyahu e ndryshoi vendimin, duke njoftuar të dielën vonë se autoritetet ishin udhëzuar t'i jepnin patriarkut "qasje të plotë dhe të menjëhershme" në kishë.

Sanchez të dielën e dënoi incidentin si një "sulm të pajustifikuar ndaj lirisë fetare".