Spanja sot dënoi deklaratat e autoriteteve izraelite në lidhje me planet e supozuara ushtarake për të shënjestruar infrastrukturën dhe zonat civile në Liban, transmeton Anadolu.

"Qeveria spanjolle dënon fuqishëm deklaratat e autoriteteve izraelite që pretendojnë se ushtria izraelite është urdhëruar të shkatërrojë të gjitha urat mbi lumin Litani si dhe shtëpitë e civilëve libanezë në fshatrat fqinje, në atë që përbën shkelje flagrante dhe të paramenduar të ligjit ndërkombëtar humanitar", tha një deklaratë e Ministrisë së Jashtme.

Ajo thekson se infrastruktura civile, përfshirë shtëpitë dhe objektet e kujdesit shëndetësor, "nuk mund të konsiderohen kurrë, sipas ligjit ndërkombëtar, objektiva ushtarake", duke shtuar se "veprime të tilla shkelin parimet më themelore të ligjit ndërkombëtar humanitar, duke shkatërruar jetën e civilëve të pafajshëm".

Ministria gjithashtu paralajmëroi kundër çdo lëvizjeje që ndikon në unitetin territorial të Libanit. "Spanja përsërit kategorikisht dënimin e saj për çdo përpjekje për të izoluar dhe ndarë territorin libanez dhe kërkon respekt për integritetin dhe sovranitetin territorial të Libanit", tha ajo.

Madridi i bëri thirrje më tej komunitetit ndërkombëtar të parandalojë "mosndëshkimin për këto veprime" dhe të forcojë mbështetjen e saj për përpjekjet e qeverisë libaneze për të konsoliduar sovranitetin dhe integritetin territorial nën autoritetin e saj.