Një sondazh ka zbuluar se shumica e gjermanëve besojnë se politikat e presidentit të SHBA-së Donald Trump kërcënojnë ekzistencën e NATO-s, transmeton Anadolu.

Sipas sondazhit të kryer nga transmetuesi publik ZDF midis 13-15 janarit me 1.245 pjesëmarrës, 78 për qind besojnë se politikat e Trumpit rrezikojnë ekzistencën e NATO-s. Vetëm 18 për qind nuk pajtohen me këtë mendim.

Lidhur me mundësinë e ndërhyrjes ushtarake të SHBA-së në politikat e vendeve të tjera në shkelje të së drejtës ndërkombëtare, 69 për qind e pjesëmarrësve besojnë se Bashkimi Evropian (BE) duhet ta kundërshtojë hapur atë. Gjithashtu 22 për qind duan që BE-ja të mbetet neutrale ndërsa vetëm 5 për qind besojnë se BE-ja duhet të mbështesë SHBA-në.

- Opinionet janë të ndara për Iranin dhe Ukrainën

Lidhur me një sulm të mundshëm të SHBA-së ndaj Iranit, gjermanët janë të ndarë.

Në kuadër të sondazhit 37 për qind e pjesëmarrësve mbështesin ndërhyrjen ushtarake të SHBA-së për t'i dhënë fund regjimit islamik në Iran ndërsa e njëjta përqindje (37 për qind) e kundërshtojnë.

Lidhur me luftën Rusi-Ukrainë, 49 për qind e gjermanëve mbështesin vendosjen e ushtrisë gjermane në Ukrainë nëse një armëpushim sigurohet nga trupat evropiane ndërsa 45 për qind e kundërshtojnë atë.

- Pakënaqësia vazhdon në ekonomi dhe politikë

Sipas sondazhit, 71 për qind e gjermanëve besojnë se qeveria nuk po bën mjaftueshëm për të ringjallur ekonominë. Përkundër kësaj, 18 për qind i konsiderojnë veprimet e qeverisë si të mjaftueshme.

Sipas sondazhit, 69 për qind e pjesëmarrësve janë kundër mundësisë që Alternativa për Gjermaninë (AfD) e ekstremit të djathtë të fitojë kryeministrinë në shtetet lindore në zgjedhjet shtetërore të këtij viti.

- Shqetësime lidhur me të djathtën ekstreme dhe ndërprerjet e energjisë elektrike

Në anën tjetër 79 për qind e të anketuarve e shohin të djathtën ekstreme si kërcënim për demokracinë gjermane. Përqindja e atyre që e shohin të majtën ekstreme si kërcënim mbetet në 57 për qind.

Për më tepër, pas ndërprerjes së zgjatur të energjisë elektrike në Berlin, 30 për qind e gjermanëve janë të shqetësuar për një ndërprerje të ngjashme që mund të ndodhë në zonën e tyre.