Autoritetet siriane evakuuan më shumë se 500 civilë nga provinca Suwayda në Daraa që nga dje duke përdorur një autokolonë prej gjashtë autobusësh, transmeton Anadolu.

Evakuimi i familjeve beduine që ishin mbajtur në qytetin e Suwayda filloi dy ditë më parë, tha agjencia e lajmeve shtetërore SANA.

Autoritetet nuk zbuluan menjëherë numrin e përgjithshëm të civilëve të evakuuar nga Suwayda deri më sot.

Të martën, zëdhënësi i Ministrisë së Brendshme siriane, Nour al-Din al-Baba, tha se evakuimi është i përkohshëm dhe të gjithë civilët do të kthehen sapo të rivendoset stabiliteti.

"Disa familje nga komunitete të ndryshme në Suwayda u evakuuan, shumë prej të cilëve ishin mbajtur peng ose ishin rrëmbyer nga bandat e armatosura", tha Al-Baba, duke folur për Anadolu.

Më 13 korrik, shpërthyen përleshje midis fiseve arabe beduine dhe grupeve të armatosura druze në Suwayda. Dhuna u përshkallëzua dhe pasuan sulmet ajrore izraelite, duke synuar pozicionet dhe infrastrukturën ushtarake siriane, përfshirë kryeqytetin, Damask.

Ndërsa Izraeli përmendi "mbrojtjen e komuniteteve druze" si pretekst për sulmet e tij, shumica e udhëheqësve druzë në Siri kanë hedhur poshtë publikisht çdo ndërhyrje të huaj dhe kanë riafirmuar angazhimin e tyre për një shtet të bashkuar sirian. Një armëpushim u njoftua të shtunën.

Qeveria e re siriane ka punuar për të rivendosur rendin në të gjithë vendin që nga rrëzimi i ish-udhëheqësit të regjimit të Bashar Asadit më 8 dhjetor 2024.