Shefi i Policisë së Parisit, Patrice Faure, ka pranuar se ka pasur mangësi serioze të sigurisë në Muzeun e Luvrit pas vjedhjes së fundit të bizhuterive mbretërore, sipas raportimeve të mediave, transmeton Anadolu.

Duke folur gjatë një seance dëgjimore në Senat, Faure tha se “siguria e Muzeut të Luvrit nuk është në rregull”, duke përmendur sistemet e vjetruara të mbikëqyrjes dhe vonesat në punimet e rinovimit si pikat më të dobëta, raportoi NOS.

Një grup hajdutësh u futën në Galerinë e Apolonit javën e kaluar, duke hapur me forcë një dritare dhe duke vjedhur tetë pjesë të bizhuterive të kurorës franceze brenda pak minutash.

“Asnjë hap nuk është ndërmarrë në frontin teknologjik,” tha Faure, duke shtuar se pjesë të rrjetit të kamerave janë të vjetruara dhe japin pamje me cilësi të ulët, të cilat është e vështirë të shpërndahen në kohë reale. Ai shtoi se projekti i rinovimit, me një kosto prej rreth 80 milionë eurosh, nuk pritet të përfundojë para vitit 2030.

Faure zbuloi gjithashtu se leja e muzeut për funksionimin e kamerave të sigurisë kishte skaduar në korrik dhe nuk ishte rinovuar kurrë. Sipas tij, alarmi i parë për grabitjen nuk erdhi nga sistemi i alarmit të Luvrit, por nga “një çiklist që telefonoi 911 pasi pa burra me helmetë në një ashensor ndërtimi jashtë”.

Duke hedhur poshtë idenë e vendosjes së një poste të përhershme policie brenda muzeut, Faure tha: “Jam rreptësisht kundër kësaj. Problemi nuk është një roje te dera, por përshpejtimi i zinxhirit të alarmit”.

Drejtoresha e Luvrit ka ofruar dorëheqjen e saj, të cilën ministrja e Kulturës e ka refuzuar. Bizhuteritë e vjedhura, me vlerë rreth 88 milionë euro, nuk ishin të siguruara.